შინაგან საქმეთა სამინისტროს განცხადებით, 8-9 სექტემბერს კახა კალაძის საარჩევნო შტაბთან განვითარებულ ინციდენტთან დაკავშირებით 3 პირი დააკავა. უწყების ინფორმაციით, 2 პირი ჯგუფური ძალადობის ბრალდებითაა დაკავებული, ხოლო 1 პირი — ქართული ოცნების საარჩევნო ბანერის დაზიანებისთვის.

"ჯგუფურად ჩადენილი ძალადობის ბრალდებით დაკავებულები არიან:1965 წელს დაბადებული ზ.მ. და 2003 წელს დაბადებული ი.ბ., ხოლო, ნივთის დაზიანების ან განადგურების ბრალდებით დაკავებულია 2002 წელს დაბადებული ი.დ.
გამოძიების მიერ მოპოვებული მტკიცებულებებით დადგინდა, რომ დაკავებულმა ზ.მ.-მ და ი.ბ.-მ 8 სექტემბერს, მელიქიშვილის გამზირზე მიმდინარე საპროტესტო აქციის მსვლელობისას, აქციის მონაწილეებზე ფიზიკურად იძალადეს. რაც შეეხება ი.დ.-ს მან მელიქიშვილის გამზირზე, პარტია "ქართული ოცნება — დემოკრატიული საქართველოს" თბილისის მერობის კანდიდატის საარჩევნო ბანერი დააზიანა," — ვკითხულობთ განცხადებაში.

გამოძიება სისხლის სამართლის კოდექსის 126-ე მუხლის პირველი პრიმა ნაწილით, 162-ე პრიმა მუხლითა და 187-ე მუხლით მიმდინარეობს. უწყების ინფორმაციით, "სამინისტრო განაგრძობს ინტენსიურ საგამოძიებო მოქმედებებს მომხდარ დანაშაულებრივ ქმედებებში მონაწილე სხვა პირების გამოვლენისა და მათი პასუხისგებაში მიცემის მიზნით. კანონდარღვევის თითოეულ ფაქტს, პოლიციის მხრიდან შესაბამისი სამართლებრივი რეაგირება მოჰყვება".

ვინ არიან დაკავებულები?

პროპაგანდისტული ტელეკომპანია "იმედი" დაკავებულების ვინაობას ავრცელებს. ჯგუფური ძალადობის ბრალდებით დაკავებულებს შორის არიან ზაზა მუმლაძე, რომელმაც აქტივისტ ქეთი ალავერდაშვილს სახეში სილა გააწნა და ირაკლი ბუაჩიძე, რომელიც რეზინის ხელკეტის გამოყენებით აქციის მონაწილეებს უსწორდებოდა.

ზაზა მუმლაძე

სოციალურ ქსელში გავრცელებულ ვიდეოებში, როდესაც პოლიცია ცდილობდა ირაკლი ბუაჩიძისგან რეზინის ხელკეტის კონფისკაცია, რის დროსაც ბუაჩიძე უპასუხებს "თქვენიანი ვარ".

რაც შეეხება კახი კალაძის საარჩევნო ბანერზე "რუსული ოცნების" დაწერისთვის დაკავებულია 23 წლის მეგი დიასამიძე — სისხლის სამართლის კოდექსის 187-ე მუხლი, რაც სხვისი ნივთის განზრახ დაზიანებას ან განადგურებას გულისხმობს აღმკვეთ ღონისძიებად ჯარიმას ან 3 წლამდე თავისუფლების აღკვეთას გულისხმობს.