ნეპალში Z თაობის მომხრეებმა ცეცხლი წაუკიდეს პრემიერმინისტრ შარმა ოლის პირად რეზიდენციას ბჰაკტაპურში, ასევე სხვა ცნობილი პოლიტიკოსების, მათ შორის ყოფილი პრემიერმინისტრების ­— შერ ბაჰადურ დეუბას და პუშპა კამალ დაჰალის სახლებს. მედიის ინფორმაციით, ხანძრის შედეგად ძლიერი დამწვრობით ყოფილი მინისტრის ცოლი გარდაიცვალა.

BBC-ს ინფორმაციით, დედაქალაქ კატმანდუში მომიტინგეებმა ცეცხლი წაუკიდეს პარლამენტის შენობას, მაღალი დაკვამლიანების გამო კი ავიამიმოსვლა შეწყდა. ქაოსის ფონზე, ციხის ოფიციალური პირების თქმით, ნეპალის დასავლეთ რაიონებში მდებარე ორი სასჯელაღსრულების დაწესებულებიდან 900-მა პატიმარმა მოახერხა გაქცევა.

ნეპალში საპროტესტო აქციები სოციალური მედიის პლატფორმების მთავრობის მიერ აკრძალვის საპასუხოდ დაიწყო, თუმცა უფრო ფართო ანტიკორუფციულ მოძრაობაში გადაიზარდა. პოლიციასთან შეტაკებების შედეგად 22 ადამიანი დაიღუპა და 400-ზე მეტი, მათ შორის სამართალდამცავები, საავადმყოფოში მოათავსეს. მას შემდეგ მთავრობამ სოციალური მედიის აკრძალვა გააუქმა, თუმცა საპროტესტო აქციები გრძელდება. დემონსტრანტები სისტემურ ცვლილებებს და კორუფციის დასრულებას ითხოვენ.

9 სექტემბერს, ნეპალის პრემიერმინისტრი შარმა ოლი გადაგა. გადადგომამდე ოლიმ განაცხადა, რომ შექმნიდა საგამოძიებო კომიტეტს, რომელიც 15 დღეში წარმოადგენდა ანგარიშს შეტაკებების შესახებ. მისი თქმით, გარდაცვლილთა ოჯახებს კომპენსაცია მიეცემოდათ, ხოლო დაჭრილები მკურნალობა დაუფინანსდებოდათ.

Reuters-ის ინფორმაციით, ნეპალში კორუფცია ფართოდ არის გავრცელებული, ხოლო ოლის მთავრობას ოპოზიცია აკრიტიკებს იმის გამო, რომ ვერ ასრულებს დანაპირებს კორუფციასთან ბრძოლასა და ეკონომიკური პრობლემების მოგვარებაზე.

ნეპალში 239-წლიანი მონარქიის გაუქმების შემდეგ არასტაბილურობაა. 2008 წლიდან მოყოლებული, ქვეყანას უკვე 14 მთავრობა ჰყავდა და არც ერთ მათგანს არ დაუმთავრებია სრული ხუთწლიანი ვადა. 73 წლის ოლი გასულ წელს მეოთხედ დაინიშნა პრემიერმინისტრად.

მიუხედავად იმისა, რომ ნეპალისთვის მასშტაბური საპროტესტო აქციები უცხო არ არის, უახლესი პროტესტები, რომლებსაც ე.წ. Z თაობა ხელმძღვანელობს, ნეპალის ბოლო ათწლეულების ყველაზე დიდი არეულობაა.

ვრცლად ნეპალში პროტესტის შესახებ: