რუსეთის პრეზიდენტი ვლადიმერ პუტინი ოფიციალური ვიზიტით ჩინეთში ჩავიდა. ჩინური საინფორმაციო სააგენტოების ცნობით, პუტინის თვითმფრინავი ჩინეთის ქალაქ ტიანძინში, ბინჰაის აეროპორტში კვირას, 31 აგვისტოს, დილით დაეშვა.

რუსეთის ლიდერის ვიზიტი ჩინეთში პრეზიდენტ სი ძინპინის მოწვევით ოთხი დღე გაგრძელდება – 31 აგვისტოდან 3 სექტემბრამდე. რუსეთის პრეზიდენტის თანაშემწის, იური უშაკოვის თქმით, ერთ ქვეყანაში ასეთი ხანგრძლივი ვიზიტები ძალიან იშვიათია.

პუტინი მონაწილეობას მიიღებს შანხაის თანამშრომლობის ორგანიზაციის სამიტში, რომელიც ტიანძინში 31 აგვისტოდან 1 სექტემბრამდე გაიმართება.

ჩინური საინფორმაციო სააგენტო "სინხუას" მიერ 30 აგვისტოს გამოქვეყნებულ ინტერვიუში პუტინმა განაცხადა, რომ სამიტი "გააძლიერებს შანხაის თანამშრომლობის ორგანიზაციის უნარს, უპასუხოს თანამედროვე გამოწვევებსა და საფრთხეებს და გააძლიერებს სოლიდარობას მთელ ევრაზიულ სივრცეში". "ეს ყველაფერი ხელს შეუწყობს უფრო სამართლიანი მრავალპოლარული მსოფლიო წესრიგის ჩამოყალიბებას", – განაცხადა რუსეთის სახელმწიფოს მეთაურმა.

პუტინმა კიდევ ერთხელ გააკრიტიკა დასავლეთის ქვეყნები და დაადანაშაულა ისინი "მეორე მსოფლიო ომის შედეგების გადახედვის", "ისტორიიდან სამარცხვინო გვერდების წაშლის" და "რევანშიზმისა და ნეონაციზმის წახალისების განზრახვაში". მან ასევე ისაუბრა "წარმოსახვით რუსულ და ჩინურ საფრთხეებზე", როგორც "იაპონური მილიტარიზმის აღორძინების“ და "კონტინენტის რემილიტარიზაციის კურსის დადგენის საბაბზე".

DW-ს ცნობით, ტიანძინში პუტინი გამართავს რიგ ორმხრივ შეხვედრებს; მოსალოდნელია მისი ორმხრივი მოლაპარაკებები ინდოეთის, თურქეთისა და ირანის ლიდერებთან. რუსეთის ლიდერის პროგრამა ასევე მოიცავს ვიზიტს პეკინში, სადაც დაგეგმილია სამმხრივი შეხვედრა მონღოლეთისა და ჩინეთის ლიდერებთან, ასევე ცალკეული შეხვედრები სი ძინპინთან და სხვა სახელმწიფოების მეთაურებთან. ასევე მოსალოდნელია, რომ ის შეხვდება ჩრდილოეთ კორეის სახალხო რესპუბლიკის ლიდერს, კიმ ჩენ ინს.

გარდა ამისა, პუტინი დაესწრება, როგორც მთავარი სტუმარი, პეკინში გამართულ საზეიმო ღონისძიებებს, რომლებიც მიეძღვნა მილიტარისტულ იაპონიაზე გამარჯვების 80 წლისთავს და მეორე მსოფლიო ომის დასრულებას. 3 სექტემბერს, ტიანანმენის მოედანზე სამხედრო აღლუმი გაიმართება.

სამიტში მონაწილეობის მისაღებად ტიანძინში ასევე ჩავიდნენ აზერბაიჯანის, სომხეთის, ბელორუსის, ყაზახეთის, ყირგიზეთის, ტაჯიკეთის, თურქმენეთის, უზბეკეთის და შანხაის თანამშრომლობის ორგანიზაციის სხვა წევრი ქვეყნების პრეზიდენტები. მიმდინარე სამიტი რიგით 25-ეა; შანხაის თანამშრომლობის ორგანიზაციის ლიდერების პირველი სამიტი ასევე ჩინეთში (შანხაი) 2001 წელს გაიმართა.

როგორც უკვე წერდა NEWS.On.ge, ჩინეთმა სტრატეგიული პარტნიორი საქართველო გამარჯვების აღლუმზე არ მიიწვია.

"ვინ მიდის ჩინეთში 2025 წლის გამარჯვების დღის სამხედრო აღლუმზე?" — ასე ჰქვია ამერიკული გამოცემა The Diplomat-ის სტატიას, რომელიც ჩინეთის საგარეო საქმეთა სამინისტროს მიწვეული სახელმწიფოების სიას ეყრდნობა. სტუმრებს შორის საქართველო არ არის.