საქართველოში საფრანგეთის ელჩის თანამდებობაზე შერაზ გასრის ოლივიე კურტო შეცვლის.

ამასთან დაკავშირებით შერაზ გასრმა სოციალურ ქსელში დაწერა. მისი თქმით ის საფრანგეთის საგარეო საქმეთა სამინისტროს გუნდსა და მის შემცვლელს შეხვდა.

"რადგან მალე სრულდება ჩემი საქმიანობა საფრანგეთის ელჩის რანგში საქართველოში, თანამდებობის გადაბარებასთან დაკავშირებით, შესანიშნავი შეხვედრა მქონდა ევროპისა და საგარეო საქმეთა სამინისტროს გუნდებთან და ჩემს შემცვლელ ოლივიე კურტოსთან, რომელიც მალე ჩამოვა თბილისში. გაგრძელება იქნება…" — დაწერა მან.

27 აგვისტოს, ოცნების საგარეო საქმეთა მინისტრმა, მაკა ბოჭორიშვილმა საქართველოში საფრანგეთის რესპუბლიკის საგანგებო და სრულუფლებიან ელჩთან, შერაზ გასრისთან გამოსამშვიდობებელი შეხვედრა გამართა.

"განსახილველ საკითხებს შორის იყო საქართველოს ევროკავშირში ინტეგრაციის საკითხი. ხაზი გაესვა ამ პროცესში შემდგომი თანამშრომლობის მნიშვნელობას და იმედი გამოითქვა, რომ ევროკავშირ-საქართველოს ურთიერთობები ჩვეულ დღის წესრიგს დაუბრუნდება. მინისტრმა წარმატებები უსურვა ელჩს მომავალ საქმიანობაში," — წერია საგარეო უწყების მიერ გავრცელებულ ინფორმაციაში.

საფრანგეთის პრეზიდენტმა, ემანუელ მაკრონმა საქართველოში საგანგებო და სრულუფლებიან ელჩად ოლივიე კურტო აგვისტოს დასაწყისში დანიშნა.