რუსეთის პრეზიდენტის, ვლადიმერ პუტინის თქმით, ქვეყნებში, სადაც რუსეთთან არამეგობრული ელიტები მოქმედებენ, პროპაგანდაა ჩართული — ამბობენ, რომ ომი რუსეთის ფედერაციამ დაიწყო და ივიწყებენ, რომ ომი ჯერ კიდევ 2014 წელს დონბასის მოსახლეობის წინააღმდეგ დაიწყო. ამის შესახებ ინფორმაციას რუსული მედია ავრცელებს.

"ჩვენ არ გვყავს არამეგობრული ქვეყნები, ჩვენ გვყავს არამეგობრული ელიტები ზოგიერთ ქვეყანაში. და გარწმუნებთ, რომ ამ ქვეყნების ხალხთან პროპაგანდა მუშაობს — მათ ტვინს ურეცხავენ და ეუბნებიან, თითქოს ჩვენ დავიწყეთ ომი. და ავიწყდებათ, რომ სწორედ მათ დაიწყეს ომი 2014 წელს, როცა ტანკები და ავიაცია გამოიყენეს დონბასის მშვიდობიანი მოსახლეობის წინააღმდეგ. აი, მაშინ დაიწყო ომი. ხოლო ჩვენ ყველაფერს ვაკეთებთ, რათა ეს შევაჩეროთ," — თქვა პუტინმა რუსეთის ბირთვული მრეწველობის საწარმოების თანამშრომლებთან შეხვედრაზე.