მას შემდეგ, რაც უკრაინამ "დრუჟბას" მილსადენზე ტრანსფორმატორულ სადგურს შეუტია, უნგრეთში რუსული ნედლი ნავთობის მიწოდება შეჩერდა. Reuters-ის ინფორმაციით, ამის შესახებ უნგრეთის საგარეო საქმეთა მინისტრმა პეტერ სიიარტომ ორშაბათს განაცხადა.

უნგრეთი რუსეთის ენერგიაზე დამოკიდებულებას მოსკოვის უკრაინაში შეჭრის შემდეგაც ინარჩუნებს და ნავთობის უდიდეს ნაწილს ნავთობსადენი "დრუჟბას" საშუალებით იღებს, რომელიც უნგრეთსა და სლოვაკეთს რუსულ ნავთობს ბელარუსისა და უკრაინის გავლით აწვდის.

სიიარტომ Facebook-ზე დაწერა, რომ ესაუბრა რუსეთის ენერგეტიკის მინისტრის მოადგილეს, პაველ სოროკინს, რომელმაც უთხრა, რომ ექსპერტები ტრანსფორმატორის სადგურის აღდგენაზე მუშაობენ, თუმცა გაურკვეველია, როდის განახლდება მიწოდება.

"ეს უკანასკნელი დარტყმა ჩვენი ენერგეტიკული უსაფრთხოების წინააღმდეგ აღმაშფოთებელი და მიუღებელია," — დაწერა სიიარტომ და არ დააკონკრეტა, როდის ან სად მოხდა თავდასხმა.

უკრაინის საგარეო საქმეთა მინისტრმა ანდრეი სიბიჰამ თავდასხმის შესახებ ინფორმაცია არც დაადასტურა და არც უარყო, თუმცა X-ზე დაწერა, რომ უნგრეთს "ახლა შეუძლია უჩივლოს" მოსკოვს და არა კიევს.

"ეს ომი რუსეთმა დაიწყო და არა უკრაინამ, რომელმაც უარი თქვა მის დასრულებაზე. უნგრეთს წლების განმავლობაში ეუბნებოდნენ, რომ მოსკოვი არასანდო პარტნიორია. ამის მიუხედავად, უნგრეთმა ყველა ღონე იხმარა რუსეთზე დამოკიდებულების შესანარჩუნებლად," — წერს სიბიჰა.