ამერიკის შეერთებული შტატების პრეზიდენტი, დონალდ ტრამპი დღეს თეთრ სახლში სომხეთისა და აზერბაიჯანის ლიდერებს მიიღებს. შეხვედრა სამშვიდობო ჩარჩო-შეთანხმების ხელმოწერით დასრულდება. შეთანხმებაში სტრატეგიულ სატრანზიტო კორიდორზე,რომელიც სამხრეთ კავკასიას გადის, ექსკლუზიური ამერიკული განვითარების უფლება შედის. ამის შესახებ ინფორმაციას Reuters ავრცელებს.

სამშვიდობო შეთანხმებამ შესაძლოა სამხრეთ კავკასია შეცვალოს. აშშ-ის ოფიციალური პირების თქმით, აზერბაიჯანის პრეზიდენტი ილჰამ ალიევი და სომხეთის პრემიერმინისტრი ნიკოლ ფაშინიანი ტრამპს თეთრ სახლში მოლაპარაკებებისთვის შეხვდებიან და ხელმოწერის ცერემონიაში მონაწილეობის მიიღებენ. ისინი ხელს მოაწერენ ჩარჩო-შეთანხმებას, რომელიც მიზნად "კონკრეტული გზის გაკვალვას მშვიდობისკენ" და დიდი ხანის განმავლობაში მოუგვარებელი სატრანზიტო საკითხის გადაწყვეტას ისახავს.

კერძოდ, საქმე ეხება ზანგეზურის დერეფანს — აზერბაიჯანმა სომხეთის გავლით სატრანსპორტო დერეფნის გაყვანა მოითხოვა, რომელიც მისი ტერიტორიის დიდ ნაწილს ნახჭევანთან — აზერბაიჯანულ ანკლავთან დააკავშირებს, რომელიც ბაქოს მოკავშირე თურქეთს ესაზღვრება.
ზანზეგურის დერეფანს სახელად დაერქმევა TRIPP (Trump Route for International Peace and Prosperity) — ტრამპის გზა საერთაშორისო მშვიდობისა და კეთილდღეობისთვის.

სომხეთისა და აზერბაიჯანის ლიდერები ასევე ხელს მოაწერენ დოკუმენტს, რომელიც მინსკის ჯგუფის დაშლას ითხოვს — ჯგუფისა, რომელსაც 1992 წლიდან საფრანგეთი, რუსეთი და აშშ კონფლიქტის მოსაგვარებლად თანათავმჯდომარეობდნენ.

სომხეთ-აზერბაიჯანის საკითხში პროგრესი მარტში დაიწყო, როდესაც აშშ-ის სპეციალური წარმომადგენელი სტივ უიტკოფი რეგიონს ეწვია.

ცნობისთვის, სომხეთსა და აზერბაიჯანს შორის დაპირისპირება 1980-იანი წლების ბოლოს დაიწყო, როდესაც მთიანი ყარაბაღი — აზერბაიჯანის რეგიონი, სადაც უმეტესად ეთნიკურად სომხური მოსახლეობა ცხოვრობდა — სომხეთის მხარდაჭერით აზერბაიჯანს გამოეყო.