ადამიანის უფლებების სწავლებისა და მონიტორინგის ცენტრის ინფორმაციით, შსს-ს და სუს-ის გენერალურმა ინსპექციებმა მათი თანამშრომლების მხრიდან აუდიტორია 115-ის წევრების მიმართ სამსახურეობრივი გადაცდომები ვერ დაადგინეს.

EMC-ის ცნობით, შინაგან საქმეთა სამინისტროს და სახელმწიფო უსაფრთხოების სამსახურის გენერალური ინსპექციიდან მიღებული პასუხი ამის შესახებ დაუსაბუთებელია.

"ჩვენთვის უცნობია, რა ღონისძიებები განხორციელდა გენერალური ინსპექციების მიერ, რა მტკიცებულებების მოპოვება მოხერხდა და რის საფუძველზე იქნა მსგავსი გადაწყვეტილება მიღებული" - აცხადებს EMC, რომელმაც 22 აპრილს მიმართა შსს-ს და სუს-ის გენერალურ ინსპექციებს თანამშრომლების საქმიანობის შემოწმების მოთხოვნით.

აღნიშნული მოთხოვნა სუს-ის და შსს-ს გენერალურმა ინსპექციებმა მას შემდეგ მიიღეს, რაც თსუ-ს სტუდენტებმა და აუდიტორია 155-ის წევრებმა ირაკლი კუპრაძემ, დეა მინაძემ და ნათია ქარჩილაძემ განაცხადეს, რომ თბილისის სახელმწიფო უნივერსიტეტში სტუდენტური პროტესტის გააქტიურების ფონზე მათი ოჯახის წევრებისა და ახლობლების მიმართ ზეწოლას ახორციელებდნენ.

"ჩვენთვის უცნობია რამდენად მოხდა ყველა იმ მტკიცებულების მოპოვება, რაც საქმის სწორი შეფასების საშუალებას მისცემდა გენერალურ ინსპექციას" - ამბობს EMC.

ადამიანის უფლებების სწავლებისა და მონიტორინგის ცენტრმა უკვე მიმართა შესაბამის უწყებებს და მათგან საქმის მასალების, ოქმებისა და შემაჯამებელი დასაბუთებული გადაწყვეტილებების ასლების გადმოცემა მოსთხოვა.

მსგავსი საბუთების მიღების შემთხვევაში, EMC აუდიტორია 115-ის წევრებთან ერთად განსაზღვრავს შემდგომ სამოქმედო ნაბიჯებს.