რუსეთის პრეზიდენტის პრესმდივნის დიმიტრი პესკოვის თქმით, რუსეთს სანქციების მიმართ იმუნიტეტი უკვე გამომუშავებული აქვს. ამის შესახებ ინფორმაციას რუსული მედია ავრცელებს.

მანამდე აშშ-ის პრეზიდენტმა დონალდ ტრამპმა თქვა, რომ თუ უკრაინასთან დაკავშირებით შეთანხმება 10-დღიან ვადაში არ იქნება მიღწეული, რუსეთის წინააღმდეგ მიღებული ზომები შესაძლოა მოიცავდეს სანქციებს, ტარიფებს და "სხვა რამესაც".

"ამ მხრივ [სანქციების მიმართ] ჩვენ უკვე გამოვიმუშავეთ გარკვეული იმუნიტეტი. ჩვენ ვაგრძელებთ ყველა იმ განცხადების აღრიცხვას, რომლებიც პრეზიდენტ ტრამპისგან, ასევე სხვა საერთაშორისო წარმომადგენლებისგან მოდის ამ თემაზე," — განაცხადა პესკოვმა ჟურნალისტებს, კითხვაზე პასუხისას.

ცნობისთვის, ტრამპი აცხადებდა, რომ რუსეთს ომის შესაჩერებლად 50-დღიან ვადას აძლევდა, წინააღმდეგ შემთხვევაში რუსეთისა და მისი სავაჭრო პარტნიორების წინააღმდეგ 100-პროცენტიანი სავაჭრო ტარიფების დაწესებას გეგმავდა.

თუმცა, 28 ივლისს ამერიკის ლიდერმა განაცხადა, რომ რუსეთითა და პროცესის პროგრესით იმედგაცრუებულია და ამიტომ ვადას 10-12 დღემდე ამცირებს. გარდა ამისა, ტრამპმა თქვა, რომ აღარ აქვს სურვილი ესაუბროს რუსეთის პრეზიდენტ ვლადიმერ პუტინს, თუმცა არ დაუკონკრეტებია, რა სახის ან რა საკითხზე კონტაქტს გულისხმობდა.