გერმანიის კანცლერ ფრიდრიხ მერცსა და საფრანგეთის პრეზიდენტ ემანუელ მაკრონს სურთ უკრაინის პრეზიდენტ ვოლოდიმირ ზელენსკისთან ანტიკორუფციული ზომების შესახებ ისაუბრონ.

როგორც უკრაინული მედია იუწყება, ამის შესახებ ბერლინში, ოთხშაბათს, გერმანიის მთავრობის წარმომადგენელმა შტეფან კორნელიუსმა განაცხადა.

კორნელიუსმა ეს განცხადება მას შემდეგ გააკეთა, რაც ოთხშაბათს გერმანიაში მერცისა და მაკრონის შეხვედრა გაიმართა.

"პრეზიდენტი მაკრონი და გერმანიის კანცლერი შეთანხმდნენ, რომ ისინი ანტიკორუფციული ბრძოლის საკითხზე უკრაინის პრეზიდენტთან ინტენსიურ მოლაპარაკებებს გამართავენ ," — განაცხადა შტეფან კორნელიუსმა.

მისი თქმით, ორივე ლიდერმა ხაზი გაუსვა იმას, რომ უკრაინა ახლა ევროკავშირისკენ მიმავალ გზაზე მნიშვნელოვან გარდამტეხ ეტაპზე იმყოფება .

კორნელიუსის განცხადებით, მერცმა და მაკრონმა უკრაინაში არსებული სამხედრო ვითარება და კიევისთვის შემდგომი სამხედრო დახმარების საკითხიც დეტალურად განიხილეს, თუმცა დეტალები არ დაუკონკრეტებიათ

23 ივლისს პრეზიდენტმა ვოლოდიმირ ზელენსკიმ ანტიკორუფციულ უწყებებზე ზეწოლის გამო საზოგადოებისა და საერთაშორისო პარტნიორების კრიტიკას უპასუხა და პირობა დადო, რომ მათი დამოუკიდებლობის უზრუნველსაყოფად საკუთარ კანონპროექტს წარადგენს.

ცნობისთვის, 2025 წლის 22 ივლისს, პრეზიდენტმა ვოლოდიმირ ზელენსკიმ ხელი მოაწერა კანონპროექტს, რომელიც, ოპოზიციონერი დეპუტატებისა და სადამკვირვებლო ორგანიზაციების შეფასებით, უკრაინის მთავარ ანტიკორუფციული ორგანოების — ეროვნული ანტიკორუფციული ბიუროს (NABU) და სპეციალური ანტიკორუფციული პროკურატურის (SAPO) დამოუკიდებლობას არღვევს

ზელენსკიმ ანტიკორუფციული ორგანოების შემზღუდავ კანონს ხელი მოაწერა