უკრაინამ რუსული ტყვეობიდან კიდევ 250 მებრძოლი დაიბრუნა. ინფორმაციას უკრაინის პრეზიდენტი, ვოლოდიმირ ზელენსკი სოციალურ ქსელში ავრცელებს.

მისივე ცნობით, დაბრუნებულთა კატეგორიებს შორის არიან მძიმედ ავადმყოფი და მძიმედ დაჭრილი მებრძოლები.

"დღეს, სტამბოლში შეთანხმებული გაცვლის მეცხრე ეტაპი შედგა. მძიმედ დაავადებული და მძიმედ დაშავებული მცველები სახლში ბრუნდებიან. დეტალების გაზიარება უკვე შეგვიძლია — სტამბოლის ბოლო შეთანხმებების ფარგლებში, ჯამში, ჩვენი 1000-ზე მეტი ადამიანის დაბრუნება მოხერხდა. ათასობით ოჯახისთვის სასიხარულოა საყვარელ ადამიანებთან ისევ ჩახუტება. მადლობა ყველას, ვინც ამაზე მუშაობდა.

დღეს დაბრუნებული მებრძოლები უკრაინას ფრონტის სხვადასხვა მიმართულებით იცავდნენ. სამი წლის განმავლობაში ადამიანების მნიშვნელოვანი რაოდენობა ტყვეობაში იყო. ყველა მიიღებს საჭირო მხარდაჭერასა და სამედიცინო დახმარებას.

მნიშვნელოვანია, რომ გაცვლები გაგრძელდეს და ჩვენი ხალხი სახლში დაბრუნდეს. მადლობა ყველას, ვინც აგრძელებს ამ თავდაუზოგავ საქმეს. ჩვენი ყველა ადამიანის დაბრუნება სახელმწიფოს პრიორიტეტია. გავაგრძელებთ ყველანაირ ძალისხმევას, რომ ტყვეობიდან ჩვენი ყველა ხალხი დავიბრუნოთ" — წერს ვოლოდიმირ ზელენსკი.

ასევე იხილეთ: