"მეც გავაკონტროლებ გამოძიების პროცესს", — ამის შესახებ ოცნების პრემიერმა აჭარის ავტონომიური რესპუბლიკის ყოფილი თავმჯდომარის, თორნიკე რიჟვაძის საქმეზე საუბრისას განაცხადა. მას ჰკითხეს — დაინტერესდა თუ არა ზეწოლას ვინ ახდენდა თორნიკე რიჟვაძეზე?

"რა თქმა უნდა, არა მარტო მე, არამედ პირველ რიგში დაინტერესდა გამოძიება ამ საკითხით და ბუნებრივია, მეც გავაკონტროლებ გამოძიების პროცესს. ეს არის ძალიან მნიშვნელოვანი საკითხი შესაბამისად იმედი მაქვს, რომ გამოძიება დაადგენს აბსოლუტურად ყველა დეტალს", — განაცხადა კობახიძემ.

მან ტელეკომპანია იმედის მიერ გავრცელებულ, სავარაუდო, თორნიკე რიჟვაძის წერილზე საუბრისას თქვა, რომ "სტრესულია იმ ადამიანის ცხოვრება, რომელიც პოლიტიკით არის დაკავებული, მათ შორის იმ დროსაც, როდესაც აღარ უკავია თანამდებობა".

"უამრავი ტყუილი ვრცელდება, არის უამრავი შეურაცხყოფა, უამრავი ცილისწამება. კონკრეტული ტელევიზიები შემიძლია დაგისახელოთ, რომლებიც ამას აკეთებდნენ. მაგალითად, ტვ პირველი, ფორმულა. ზოგადად გარემო არის პოლიტიკოსისთვის სტრესული, სტრესულია პოლიტიკოსის ცხოვრება, მას აბრალებენ ათას ტყუილს, შეურაცხყოფას აყენებენ, ეს არის, რა თქმა უნდა, ყველას პასუხისმგებლობა, ვინც საქართველოში ცდილობს, რომ დათესოს სიძულვილი ჩვენ ამ პრობლემაზე ხშირად გვისაუბრია და ეს არის ერთ-ერთი ეროვნული პრობლემა და გამოწვევა ჩვენი ქვეყნისთვის. სიძულვილის მუდმივი დათესვა ხდება ძირითადად ტყუილების გავრცელებით, ცილისწამებით, შეურაცხყოფით. ამიტომ არავის არ უნდა უკვირდეს, როდესაც ადამიანი განიცდის ცილისწამებას და შეურაცხყოფას მის მიმართ. მე არ მითქვამს, რომ მედიები იგულისხმება [რიჟვაძის წერილში], მე ერთ-ერთი მაგალითი მოვიყვანე და დანარჩენი უნდა დაადგინოს გამოძიებამ", — განაცხადა ირაკლი კობახიძემ.

შეგახსენებთ, რომ 8 ივლისს ოცნების პრემიერმა პირველ საუნივერსიტეტო კლინიკაში მოინახულა თორნიკე რიჟვაძე. გვიან ღამით კი ის, ოჯახის სურვილით, სამკურნალოდ თურქეთის კლინიკაში გადაიყვანეს.

თორნიკე რიჟვაძე 2025 წლის 7 ივლისს, საგარეჯოს "ჯეოჰოსპიტალსში" გულმკერდის არეში ცეცხლნასროლი ჭრილობით შეიყვანეს. გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს.

ექიმების განმარტებით, მას ფილტვი ჰქონდა დაზიანებული.

თორნიკე რიჟვაძის საქმეზე, ცეცხლსასროლი იარაღის დაუდევრად შენახვისთვის, საქართველოს სისხლის სამართლის კოდექსის 238-ე მუხლით საზღვაო ტრანსპორტის სააგენტოს უფროსი ალექსი ახვლედიანი დააკავეს.

8 ივლისს ალექსი ახვლედიანი 30 000-ლარიანი გირაო შეუფარდეს და სასამართლო დარბაზიდან გაათავისუფლეს.

მეტი თორნიკე რიჟვაძის საქმეზე: