"ძალიან მძიმე, შოკისმომგვრელი ამბავი იყო ყველასთვის, თავზარდამცემი, შეიძლება ასე ითქვას. ყველაფერს აკეთებენ ექიმები იმისთვის, რომ შენარჩუნდეს ჯანმრთელობა", — ასე შეაფასა პირველ საუნივერსიტეტო კლინიკაში მისულმა ოცნების ხელისუფლების ჯანდაცვის მინისტრმა, მიხეილ სარჯველაძემ აჭარის ავტონომიური რესპუბლიკის ყოფილი თავმჯდომარის, თორნიკე რიჟვაძის ჯანმრთელობის მდგომარეობა.

მისი თქმით, თორნიკე რიჟვაძე ამჟამად რეანიმაციულ განყოფილებაში იმყოფება.

"გვიან ღამე შეიყვანეს საგარეჯოს კლინიკაში ბატონი თორნიკე. მძიმე ტრავმა აქვს მიღებული, ცეცხლსასროლით ჭრილობა აქვს მიყენებული. ჩაუტარდა გადაუდებელი ღონისძიებები, ქირურგიული ოპერაცია იქვე ადგილზე, ყველა საჭირო პროცედურა იქნა განხორციელებული იმისთვის, რომ სასიცოცხლოდ მნიშვნელოვანი პარამეტრები აღდგენილიყო.

ამჟამად იმყოფება რეანიმაციულ განყოფილებაში. ვინაიდან ძალიან მძიმე ტრავმები აქვს ორგანიზმისთვის. ბუნებრივია, ამ დროის აუცილებელია გარკვეული პრევენციული ღონისძიებების ჩატარება, სამედიცინო თვალსაზრისით ვგულისხმობ, ისე როგორც მკურნალობითი, აღდგენითი და ასე შემდეგ. ყველაფერი, რაც აუცილებელია სიცოცხლის გადარჩენისთვის, ჯანმრთელობის შენარჩუნებისთვის, უკლებლივ ყველაფერი უკეთდება ბატონ თორნიკეს. ძალიან მძიმე, შოკისმომგვრელი ამბავი იყო ყველასთვის, თავზარდამცემი, შეიძლება ასე ითქვას. ყველაფერს აკეთებენ ექიმები იმისთვის, რომ შენარჩუნდეს ჯანმრთელობა", — განაცხადა ოცნების ხელისუფლების ჯანდაცვის მინისტრმა, მიხეილ სარჯველაძემ პირველ საუნივერსიტეტო კლინიკაში.

შსს-ს ცნობით, 2025 წლის 7 ივლისს, საგარეჯოს "ჯეოჰოსპიტალსში", შეყვანილი იქნა აჭარის ავტონომიური რესპუბლიკის მთავრობის ყოფილი თავმჯდომარე თორნიკე რიჟვაძე, რომელსაც გულმკერდის არეში ცეცხლნასროლი ჭრილობა აღენიშნებოდა.

"შინაგან საქმეთა სამინისტროში გამოძიება სისხლის სამართლის კოდექსის 115-ე მუხლით არის დაწყებული, რაც თვითმკვლელობამდე მიყვანას გულისხმობს. ფაქტთან დაკავშირებით მიმდინარეობს ინტენსიური საგამოძიებო მოქმედებები.

თორნიკე რიჟვაძეს ჩაუტარდა გადაუდებელი სამედიცინო დახმარება. ექიმების განმარტებით, მას ფილტვი აქვს დაზიანებული და მისი ჯანმრთელობის მდგომარეობა სტაბილურად მძიმეა.

ასევე, ცეცხლსასროლი იარაღის დაუდევრად შენახვისთვის, საქართველოს სისხლის სამართლის კოდექსის 238-ე მუხლით, ბრალდებულის სახით ერთი პირია დაკავებული", — ნათქვამია უწყების მიერ გავრცელებულ ინფორმაციაში.

IPN-ის ცნობით, თორნიკე რიჟვაძის საქმეზე, ცეცხლსასროლი იარაღის დაუდევრად შენახვისთვის, საქართველოს სისხლის სამართლის კოდექსის 238-ე მუხლით, ბრალდებულის სახით საზღვაო ტრანსპორტის სააგენტოს უფროსი ალექსი ახვლედიანი დაკავებული. ამის შესახებ ინფორმაციას IPN ავრცელებს.