ოცნების პარლამენტის დროებით საგამოძიებო კომისიაზე გამოუცხადებლობისთვის დაწესებული გირაოს გადაუხდელობისთვის კოალიცია ცვლილებისთვის ლიდერს, ნიკა მელიას სასამართლომ პატიმრობა შეუფარდა. მანამდე მან მოსამართლე ირაკლი შვანგირაძეს სასამართლო პროცესზე წყალი შეასხა.

მელიას გაღიზიანება მოჰყვა მის კითხვას — რატომ არ უჩნდება მოსამართლეს კითხვა, როგორ "გაიტაცეს" 29 მაისს ლისი ტბის მიმდებარე ტერიტორიიდან და როგორ მოხდა მისი დაკავება სასამართლო პროცესამდე ერთი დღით ადრე.

"ფორმალურად მქონდა ღამის 12 საათამდე გირაოს გადახდის ვადა და 9 საათზე გაიტაცეს ის ადამიანი, რომელიც ახლა თქვენ გელაპარაკებათ და კითხვა არ გიჩნდებათ რა მოხდა და უნდა დამისვათ ახლა კითხვა, რატომ არ ვიხდი იმ უსამართლო ჯარიმას. ის გაინტერესებთ რაზეც პასუხი გაქვთ და ის არ გაინტერესებთ ვინ გამიტაცა და აქ როგორ აღმოვჩნდი.

თქვე ახლა უნდა იმსჯელოთ ვინ არის მტყუანი და მართალი. თქვენ რა სიმართლე უნდა დაადგინოთ? ნუ გწყინთ, რომ არც "მოსამართლეს" გიწოდებთ და ვერც "ბატონოს" დაგიძახებთ. იმიტომ, რომ კითხვა არ გიჩნდებათ, როგორ აღმოვჩნდი აქ. არ მიკვრის. აქ ასობით ნაცემი და ნაწამები ადამიანი მოჰყავდათ თქვენთან და თქვენს კოლეგებთან და იმათ არ ეკითხებოდით ვინ აწამა და ისე უსჯიდით ადმინისტრაციულ პატიმრობას", — განაცხადა მელიამ.

მანამდე ოპოზიციური პარტიის ლიდერმა მისი დაკავების დეტალებზე ისაუბრა. მელიას თქმით, მისი დაკავება ძალის გადამეტებით მოხდა.

"მძღოლის ჩათვლით იყო 11 ადამიანი სამარშრუტო ფურგონში, სადაც მე ძალის გამოყენებით გამიტაცეს. მოხდა გატაცება, ძალის ძალიან არასწორი გამოყენებით მანქანაში ჩატევა, მერე ძალის გამოყენებით მობილური ტელეფონის წართმევა, მერე ერთ-ერთის დაუოკებელი სურვილი, რომ მოეხსნათ კოდი ჩემს ტელეფონზე", — თქვა "კოალიცია ცვლილებებისთვის" ერთ-ერთმა ლიდერმა, ნიკა მელიამ სასამართლო პროცესზე დაკავების დეტალებზე საუბრისას.

შეგახსენებთ, რომ კოალიცია ცვლილებისთვის ერთ-ერთი ლიდერი, ნიკა მელია 29 მაისს, საღამოს, ლისის ტბის ასახვევთან დააკავეს. შსს-ს ცნობით, ნიკა მელია ადმინისტრაციული წესით, სამართალდამცავი ორგანოს შეურაცხყოფისთვის დააკავეს.

ნიკა მელიას ქართული ოცნების პარლამენტის დროებით საგამოძიებო კომისიაზე გამოუცხადებლობას ედავებიან. მელიას სასამართლო დღეს, 30 მაისს, 14:00-ზეა ჩანიშნული. პოლიტიკოს გირაოს გადახდის ვადა 29 მაისს ამოეწურა. მანამდე ის აცხადებდა, რომ სასამართლოზე მისვლას არ აპირებდა.

ნიკა მელიას ბრალდება სისხლის სამართლის კოდექსის 349-ე მუხლით წარედგინა, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს. ამ მუხლით ბრალდებული ყოფილი თავდაცვის მინისტრი ირაკლი ოქრუაშვილი და "კოალიცია ცვლილებებისთვის" ლიდერი ზურაბ გირჩი ჯაფარიძე დაკავებული არიან.