ქართული ოცნების მიერ ინიციირებული საკანონმდებლო ცვლილების მიხედვით, კომუნიკაციების კომისიას ბანკებისგან მაუწყებლების შესახებ კონფიდენციალური ინფორმაციის გამოთხოვა სასამართლოს მეშვეობით შეეძლება.

საკანონმდებლო ცვლილებათა პაკეტი ქართული ოცნების პარლამენტში 28 მაისს დარეგისტრირდა.

ინიციირებული საკანონმდებლო ცვლილებებით, აკრძალულია მაუწყებლის დაფინანსება ადმინისტრაციული ორგანოების, პოლიტიკური პარტიების, თანამდებობის პირებისა და საჯარო მოსამსახურეების მიერ. აკრძალულია ასევე მიერ მათ მიერ: მაუწყებლის მომსახურების შეძენა, პროგრამების მომზადების ან ეთერში გადაცემის პირდაპირი/ირიბი დაფინანსება ან თანადაფინანსება.

განმარტებითი ბარათის მიხედვით, "მაუწყებლობის შესახებ" საქართველოს კანონის 661 მუხლი ადგენს გარკვეულ აკრძალვებს მაუწყებლების დაფინანსებასთან დაკავშირებით. კერძოდ, აკრძალულია მაუწყებლის დაფინანსება ადმინისტრაციული ორგანოს, პოლიტიკური პარტიის, თანამდებობის პირისა და საჯარო მოსამსახურის მიერ. ასევე, აკრძალულია მაუწყებლის მიერ უცხოური ძალისგან პირდაპირი ან არაპირდაპირი დაფინანსების (ფულადი თანხის ან ქონებრივი ღირებულების სხვა სახის მატერიალური სიკეთის) მიღება.

ამას გარდა, კომისია უფლებამოსილია მედიამომსახურების მიმწოდებლებისგან (მათ შორის მაუწყებლებისგან) და ვიდეოგაზიარების პლატფორმის მომსახურების მიმწოდებლებისგან გამოითხოვოს კანონითა და კომისიის ნორმატიული აქტებით გათვალისწინებული ინფორმაცია.

რაც შეეხება სანქციის კიდევ ერთ სახეს — ავტორიზაციის შეჩერებას, მისი გამოყენება შესაძლებელია მხოლოდ დარღვევის 1 წლის განმავლობაში მესამედ ჩადენის/აღმოუფხვრელობის შემთხვევაში.

ქართული ოცნების წევრები ცვლილებების დაჩქარებული წესით განხილვას მოითხოვენ, "რათა მისი მიღება და ამოქმედება მოესწროს მიმდინარე წლის საგაზაფხულო სესიაზე.