16-17 სექტემბერს, თბილისში, პირველად ტარდება Khan Academy-ის საერთაშორისო კონვენცია, რომლის ორგანიზატორებიც Educare Georgia და Khan Academy-ი არიან. კონვენციის ფარგლებში თბილისში სხვადასხვა ქვეყნის წარმომადგენლები ჩამოდიან, რომლებიც თავიანთ ქვეყნებში ორგანიზებას უწევენ ხანის აკადემიის ლოკალიზაციის, თარგმნის, პოპულარიზაციისა და სწავლებაში დანერგვის პროცესს.

კონვენციაში ჩართული იქნება როგორც მეზობელი ქვეყნებიდან, ისე ევროპიდან, ამერიკიდან და აზიიდან ჩამოსული 25 მონაწილე.

კონვენციის მთავარი მიზანია ხანის აკადემიის ლოკალიზაციასთან დაკავშირებული წინაღობების მოგვარება. კონვენციაზე განიხილება, თუ როგორ უნდა იყოს სასწავლო მასალები არამხოლოდ ნათარგმნი, არამედ ადგილობრივ კონტექსტს ადეკვატურად მორგებული. ამასთან, კონვენციის მონაწილეები სამომავლო გეგმებზეც ისაუბრებენ.

ასეთი კონვენცია მესამედ ტარდება. გასულ წელს კონვენცია ბულგარეთის დედაქალაქში ჩატარდა, სადაც ქართულმა წარმომადგენლობამ პირველად გაიცნო ხანის აკადემიის წარმომადგენლები და სხვა ქვეყნის გუნდები.

წელს კი, კონვენციას თბილისი მასპინძლობს. როგორც ორგანიზატორები აცხადებენ, მოსამზადებელი სამუშაოები ახლაც მიმდინარეობს, თუმცა მხოლოდ წვრილმანი დეტალების მოგვარებაა დარჩენილი.

როგორც წესი, კონვენცია ფართო აუდიტორიისთვის დახურულია. მიუხედავად ამისა, ქართული მხარის მუშაობის შედეგად, უცხოელი განმანათლებლების ნაწილი საჯარო გამოსვლასაც ჩაატარებს, რომელიც 18 სექტემბერს, 17:00 სთ.-ზე, ფაბრიკის საკონფერენციო დარბაზში ჩატარდება.

ამ ღონისძიებაზე დასწრება თავისუფალი იქნება. კონფერენციის სასაუბრო თემა იქნება ციფრული რევოლუცია სასკოლო განათლებაში.

კონფერენციაზე სიტყვით გამოვლენ შემდეგი მომხსენებლები:

ჯეიკ გოლდვასერი - პედაგოგი და ლოკალიზაციის სპეციალისტი. ფულბრაიტის სტიპენდიანტი და ხანის აკადემიის ლოკალიზაციის ხელმძღვანელი.

ჯულიან ჰარტი - საგანმანათლებლო ტექნოლოგიის და ღია კოდის გამავრცელებელი, საგანმანათლებლო ტექნოლოგიის ექსპერტი, კომპიუტერული მეცნიერი.

ლეხ მანკევიჩი - მეცნიერი, პროფესორი და პედაგოგი. პოლონეთის მეცნიერებათა აკადემიის თეორიული ფიზიკის ცენტრის დირექტორი. პოლონური ხანის აკადემიის მხარდამჭერი. ციფრული განათლების ენთუზიასტი.