ყველა დროის ერთ-ერთ საუკეთესო სიტკომად მიჩნეული The Office-ის გამოსვლიდან 20 წელი სრულდება. ამერიკული სერიალი, რომელიც ამავე სახელწოდების ბრიტანული სიტკომის ანალოგია, კულტურულ მოვლენად იქცა. ინტერნეტსივრცე ოფისის მიმებითაა გადავსებული, სერიალიდან ფრთიან ფრაზებს კი დღემდე იყენებენ.

ასე რომ, სულ არაა გასაკვირი, ამდენად ეპოქალურ სერიალს რომ სპინ-ოფი მოჰყვა. მეტიც, დაგვიანებულადაც კი შეიძლება ჩაითვალოს. თუმცა, ჯობს გვიან, ვიდრე არასდროს — ოფისის სპინ-ოფს, სახელწოდებით გაზეთი, სულ მალე ვიხილავთ.

ვინ იმუშავებს გაზეთზე?

სერიალის შემქმნელმა ტელეკომპანია NBC-მ ცოტა ხნის წინ განაცხადა, რომ გაზეთის პრემიერა სექტემბერში შედგება. გადაღებები წინა ზაფხულს დაიწყო. პროექტზე გრეგ დენიელსი და მაიკლ კომენი მუშაობენ. დენიელსს ოფისზეც უმუშავია, კომენი კი ცნობილი კომედიური სერიალის, Nathan For You-ის, შემქმნელია.

რაც მთავარია, აღმასრულებელ პროდიუსერებად რიკი ჯერვეისი და სტივენ მერჩანტი მოგვევლინებიან. სწორედ ამ ლეგენდარული ტანდემის შექმნილია ბრიტანული ოფისი.

რა იქნება ოფისის მსგავსი და რა — განსხვავებული?

ოფისის მსგავსად, გაზეთიც "მოკუმენტური" (დოკუმენტურის პაროდია) სიტკომია. მოქმედება იმავე გამოგონილ სამყაროში ხდება, მაგრამ ამჯერად საგაზეთო ინდუსტრიაში ვინაცვლებთ: გადამღები ჯგუფი, რომელიც დანდერ მიფლინის თანამშრომლებს დაჰყვებოდა, ახლა ოჰაიოს შტატის ქალაქ ტოლედოში მიემგზავრება გაზეთ The Truth Teller-ის ("სიმართლის მთქმელი") რედაქციაში, სადაც გამოცემის გამოსაცოცხლებლად ახალი კადრები მოჰყავთ.

ოფისის ერთადერთი პერსონაჟი, რომელზეც დადასტურებულად ვიცით, რომ ახალ სერიალშიც გამოჩნდება, დანდერ მიფლინის ბუღალტერი ოსკარ მარტინესია. მისი ახალი სამსახური სწორედ გაზეთი სიმართლის მთქმელი გახლავთ.

"გრეგ დენიელსს ვუთხარი, ოსკარი თუ დაბრუნდება, ალბათ უფრო ხალხმრავალ და კოსმოპოლიტურ ქალაქში იცხოვრებს-მეთქი", — ამბობს მარტინესის შემსრულებელი მსახიობი, ოსკარ ნუნიესი, — "გრეგმაც დამიჯერა და ოსკარი საცხოვრებლად ტოლედოში გადადის, რომლის მოსახლეობაც სამჯერ აღემატება სკრენტონს [ქალაქი, სადაც დანდერ მიფლინის ფილიალია].

თუმცა, გაზეთში შეიძლება სხვა ნაცნობი სახეებიც ვიხილოთ. ჯონ კრასინსკიმ (ჯიმი) თქვა, რომ თუკი შესთავაზებენ, სერიალში ეპიზოდურ როლს სიამოვნებით შეასრულებს. ოფისის სხვა მსახიობებმა, ჯენა ფიშერმა (პემი) და ანჯელა კინზიმ (ანჯელა) კი, ინტერვიუში აღნიშნეს, რომ გაზეთის გადაღებებს ესწრებოდნენ.

აბა, ვინ ითამაშებს გაზეთში?

სერიალში მთავარ გმირებს დონალ გლიზენი (გაზეთის ახალი თანამშრომელი) და საბრინა იმპაჩატორე (გაზეთის მთავარი რედაქტორი) განასახიერებენ. ეს უკანასკნელი შეიძლება HBO-ის თეთრი ლოტოსიდან გახსოვდეთ, რომლის მეორე სეზონშიც სასტუმროს მენეჯერი განასახიერა. გლიზენის ერთ-ერთი ყველაზე ცნობილი როლი კი ჰარი პოტერში შესრულებული ბილ უიზლია.

სერიალში მონაწილე სხვა მსახიობები არიან ჩელსი ფრაი, მელვინ გრეგი, ბემისოლა იკუმელო, ალექს ედელმანი, რამონა იანგი და ტიმ ქი.