თბილისის საქალაქო სასამართლოში ქართული ოცნების პარლამენტის დროებით საგამოძიებო კომისიაზე გამოუცხადებლობის გამო სტრატეგია აღმაშენებლის ლიდერის, გიორგი ვაშაძის წინააღმდეგ აღძრული საქმე არსებითი განხილვისთვის სასამართლოს გადაეცა.

დაცვის მხარემ სასამართლოს შუამდგომლობით მიმართა, დასაკითხ პირთა სიაში შეეყვანათ დროებითი საგამოძიებო კომისიის თავმჯდომარე თეა წულუკიანი და კომისიის წევრები. პროკურატურის მოთხოვნა კი იყო, რომ დასაკითხი პირების სიიდან გამოერიცხათ ზემოხსენებული პირები.

მიუხედავად იმისა, რომ გიორგი ვაშაძემ კომისიაზე გამოუცხადებლობისთვის დაკისრებული 50 000-ლარიანი გირაო გადაიხადა, მოსამართლე ნატო ხუჯაძის განმარტებით, არ არსებობს საკმარისი საფუძველი, რომ ბრალდებულის მიმართ სისხლის სამართლის დევნა შეწყდეს.

ვაშაძემ გირაო ვადის ამოწურვამდე გადაიხადა. შეგახსენებთ, კომისიაზე გამოუცხადებლობისთვის დაკისრებული გირაოს არ გადახდისთვის სასამართლომ ზურაბ ჯაფარიძეს და ირაკლი ოქრუაშვილს თავისუფლების აღკვეთა მიუსაჯა.

სასამართლო პროცესის შემდეგ, ვაშაძეს და სასამართლოს მანდატურებს შორის დაპირისპირება მოხდა. ინტერპრესნიუსის ინფორმაციით, სასამართლოს შენობაში ვაშაძე შეესწრო მანდატური ქალზე როგორ ძალადობდა. მას შემდეგ, რაც ვაშაძემ ცადა მანდატურის შეჩერება, მას უპასუხეს, რომ "თავისი საქმისთვის მიეხედა" და ამის შემდეგ პოლიტიკოსსა და მანდატურებს შორის სიტყვიერი და ფიზიკური დაპირისპირება მოხდა. ვაშაძეს შენობა ძალის გამოყენებით დაატოვებინეს.