უჩა ქემაშვილი, ახალგაზრდა კაცი, რომელსაც კახეთიდან საპროტესტო აქციის მონაწილეებისთვის ალუჩა ჩამოჰქონდა, სავარაუდოდ, ქართული ოცნების დროშის დაწვის გამო დააკავეს.

როგორც უჩა ქემაშვილის და ნინო ქემაშვილი სოციალურ ქსელში წერს, მეტროში აედევნენ და ვარკეთილის მეტროსთან დააკავეს.

"თურმე რის გამო დაუკავებიათ.. რუსთაველიდან ვარკეთილამდე გამოჰყვნენ. სავარაუდოდ, მეტროთი წამოვიდოდა ჩემი ძმა, რადგან აქ ჰყავდა მანქანა გაჩერებული. მეტროში აედევნენ და იცოდნენ, სად მოდიოდა.. 35 ადამიანი 1 კაცის დასაჭერად გამოუშვეს ხალხო.

მე ამ ყველაფერს ფანჯრიდან ვუყურებდი და მერე ჩავედი დაბლა. გვიან მივხვდი რა ხდებოდა. არადა ჩემი ძმა არ არის ჩხუბის თავი. მანქანის კარი მიიხურა და გამოუღეს, ხელი მოკიდეს და გადმოიყვანეს, შეიყვანეს ბნელ ადგილას და იქ ჩასვეს სხვა მანქანაში", — წერს ნინი ქემაშვილი.

NEWS.ON.ge ინფორმაციის შსს-ში გადამოწმებას ცდილობს. მაგრამ უწყებისგან პასუხი ჯერჯერობით არ მიგვიღია.