13 მარტის დილით დონალდ ტრამპის წარმომადგენელი ახლო აღმოსავლეთში სტივ უიტკოფი მოსკოვში ჩაფრინდა უკრაინაში 30-დღიანი ცეცხლის შეწყვეტის შეთანხმების განხილვისთვის.

თეთრი სახლის პრესმდივანმა კაროლინ ლევიტმა ჟურნალისტებს ბრიფინგზე განუცხადა, რომ ელჩის მოსკოვში ვიზიტი არის აშშ-ის მცდელობა დაითანხმოს რუსეთი ცეცხლის შეწყვეტაზე.

"ვიტკოვის მოგზაურობა არის ჩვენი მცდელობის ნაწილი, რათა "ზეწოლა მოვახდინოთ" რუსეთს, დათანხმდეს ცეცხლის შეწყვეტაზე და შეაჩეროს მისი სასტიკი ომი უკრაინის წინააღმდეგ," — განაცხადა კაროლინ ლევიტმა.

ამერეკასა და რუსეთს შორის მოლაპარაკებები კრემლის პრესსპიკერმა დიმიტრი პესკოვმაც დაადასტურა და დასძინა, რომ "კონტაქტები დაგეგმილია". პესკოვის თქმით, რუსეთი არ განიხილავს წინასწარ არაფერს მოლაპარაკებებზე და ჟურნალისტებთან საუბრისას არ დააკონკრეტა უიტკოფის რუსეთის პრეზიდენტ ვლადიმერ პუტინს შეხვედრა თუ შედგება.

შეგახსენებთ, რუსეთში აშშ-ის დელეგაციის ჩამოსვლამდე რამდენიმე საათით ადრე, მაშინ, როცა აშშ-ს დელეგაციას სურს დაარწმუნოს კრემლი, დათანხმდეს უკრაინასთან 30-დღიან ზავს, ვლადიმერ პუტინის მთავარი თანაშემწე უარყოფს უკრაინასთან დროებითი ცეცხლის შეწყვეტის შესაძლებლობას.

12 მარტს რუსეთის პრეზიდენტი ვლადიმერ პუტინი პირველად ეწვია კურსკის რეგიონს მას შემდეგ, რაც 2024 წლის აგვისტოში უკრაინულმა ძალებმა კურსკის ნაწილი დაიკავეს. პუტინის განცხადებით, რუსულმა ძალებმა მთლიანად უნდა გაათავისუფლონ რეგიონი უკრაინული ჯარებისგან. მისი თქმით, ყველა, ვინც კურსკის ოლქის ტერიტორიაზე იმყოფება და მოქალაქეების მიმართ დანაშაულებს სჩადის, ტერორისტად უნდა ჩაითვალოს.

ცნობისთვის, რუსეთმა შეერთებულ შტატებს უკრაინის წინააღმდეგ ომის დასრულებისა და ვაშინგტონთან ურთიერთობების აღდგენის შესახებ შეთანხმების მოთხოვნების სია წარუდგინა.

მედიის ცნობით, კრემლის ამჟამინდელი მოთხოვნები იმის მსგავსია, რაც რუსულმა მხარემ ადრე უკრაინას, შეერთებულ შტატებსა და NATO-ს წარუდგინა: უკრაინის NATO-ს წევრობაზე უარის თქმას, შეთანხმებას უკრაინაში უცხოური ჯარების არ განლაგების შესახებ და ყირიმისა და 4 უკრაინის რეგიონის საერთაშორისო აღიარებას რუსეთის შემადგენლობაში.