რუსეთმა შეერთებულ შტატებს უკრაინის წინააღმდეგ ომის დასრულებისა და ვაშინგტონთან ურთიერთობების აღდგენის შესახებ შეთანხმების მოთხოვნების სია წარუდგინა. ამის შესახებ Reuters წერს.

სააგენტო წერს, რომ უცნობია კონკრეტული დეტალები რა მოთხოვნები შეიტანა მოსკოვმა აღნიშნულ სიაში ან მზად არის თუ არა ჩაერთოს კიევთან სამშვიდობო მოლაპარაკებებში მათ მიღებამდე.

Reuters-ის ცნობით, კრემლის ამჟამინდელი მოთხოვნები იმის მსგავსია, რაც რუსულმა მხარემ ადრე უკრაინას, შეერთებულ შტატებსა და NATO-ს წარუდგინა.

რუსეთის ადრინდელი მოთხოვნები მოიცავდა: უკრაინის NATO-ს წევრობაზე უარის თქმას, შეთანხმებას უკრაინაში უცხოური ჯარების არ განლაგების შესახებ და ყირიმისა და 4 უკრაინის რეგიონის საერთაშორისო აღიარებას რუსეთის შემადგენლობაში.

ბოლო წლებში რუსეთი ასევე ახდენდა ზეწოლას შეერთებულ შტატებსა და NATO-ზე, რომ მოეგვარებინათ ის "ძირითადი მიზეზები", რაც უკრაინასთან კონფლიქტის მიზეზი გახდა და ამ მიზეზში NATO-ს აღმოსავლეთით გაფართოება იგულისხმებოდა.

• როდის გაიმართება აშშ-რუსეთის მოლაპარაკებები უკრაინის ომზე და რა პირობებს აყენებდა პუტინი თვენახევრის წინ?

აშშ-ის პრეზიდენტი დონალდ ტრამპი ელოდება ვლადიმერ პუტინის პასუხს, თანახმა იქნება თუ არა ის 30-დღიან ცეცხლის შეწყვეტაზე, რომელსაც უკრაინა დათანხმდა. უკრაინის პრეზიდენტმა ვოლოდიმირ ზელენსკიმ ამას სამშვიდობო მოლაპარაკებებისკენ გადადგმული პირველი ნაბიჯი უწოდა.

• ზელენსკი: უკრაინა მზადაა, მიიღოს ცეცხლის შეწყვეტის წინადადება, ახლა აშშ-ს გადასაწყვეტია, დაარწმუნოს რუსეთი, იგივე გააკეთოს

ამ ფონზე, რუსეთის პრეზიდენტის ადმინისტრაციის ცნობით, 12 მარტს ვლადიმერ პუტინი კურსკში ერთ-ერთ სამხედრო პუნქტს ეწვია. კრემლის მიერ გავრცელებულ კადრებში ჩანს, რომ სამხედრო ფორმაში გამოწყობილი პუტინი რუსეთის შეიარაღებული ძალების გენერალური შტაბის უფროსს, ვალერი გერასიმოვს ხვდება.

• პუტინი კურსკში სამხედრო ფორმით გამოჩნდა და თქვა, რომ რეგიონი მთლიანად უნდა გაათავისუფლონ უკრაინული ჯარებისგან

შეხვედრაზე პუტინმა განაცხადა, რომ კურსკის ოლქი სრულად უნდა გათავისუფლდეს უკრაინის ჯარებისგან და უნდა იფიქრონ სახელმწიფო საზღვრის გასწვრივ უსაფრთხოების ზონის შექმნაზე.

გერასიმოვის თქმით, რუსული ჯარები აკონტროლებენ კურსკის ოლქში უკრაინის შეიარაღებული ძალების მიერ დაკავებული ტერიტორიის 86%-ზე მეტს და ბოლო 5 დღის განმავლობაში რუსულმა ჯარმა კონტროლის ქვეშ 24 დასახლებული პუნქტი აიყვანა.

შეგახსენებთ, რომ 11 მარტს საუდის არაბეთში გამართული შეხვედრის შემდეგ უკრაინა დათანხმდა ცეცხლის დაუყოვნებლივ 30-დღიან შეწყვეტას, თუ რუსეთიც იგივე ნაბიჯს გადადგამს.

პუტინის დამოკიდებულება ცეცხლის შეწყვეტის შესახებ პოტენციური შეთანხმების მიმართ გაურკვეველია, რადგან დეტალები ჯერ არ არის დაზუსტებული.

შეერთებული შტატების სახელმწიფო მდივანმა მარკო რუბიომ განაცხადა, რომ შეერთებული შტატები რუსეთს გადასცემს "ცეცხლის შეწყვეტის" წინადადებას და იმედი აქვს, რომ შეთანხმება იქნება.