100 დღის წინ, 2024 წლის 25 ნოემბერს, საქართველოს მე-11 მოწვევის პარლამენტი არჩევნების უხეში დარღვევების, გაყალბების აშკარა შემთხვევების, საერთაშორისო კომისიების წნეხისა და გაჟონილი საარჩევნო ბიულეტენების მიუხედავად შეიკრიბა.

გასული 100 დღის განმავლობაში საქართველოს არალეგიტიმურმა პარლამენტმა მიიღო რეპრესიული კანონები, დევნის მშვიდობიან მომიტინგეებს, წმენდს საჯარო სამსახურებს და ქვეყანას სრულ იზოლაციაში აქცევს. წარმოგიდგენთ პარლამენტის რამდენიმე მიღწევას, რომლებითაც პირველ ას დღეში ივანიშვილის მთავრობამ თავი გამოიჩინა:

პირველი საპარლამენტო სხდომიდან 3 დღეში, საქართველოს პრემიერმინისტრმა, ირაკლი კობახიძემ, განაცხადა, რომ საქართველო წყვეტს ევროინტეგრაციის პროცესს.

არჩევნებში "გამარჯვებისთვის" მილოცვები მიიღეს ისეთი ქვეყნებისგან, როგორებიცაა აზერბაიჯანი, სომხეთი, ჩინეთი, უნგრეთი, ვენესუელა და თურქეთი. საქართველოს პარლამენტს აღიარება არ მიუღია ქვეყნის დასავლელი პარტნიორებისგან.

ფოტო: RFE/RL

ერთპარტიულმა პარლამენტმა ქვეყნის პრეზიდენტად მიხეილ ყაველაშვილი აირჩია — უდიპლომო ფეხბურთელი, რომელსაც რამდენიმე წლის წინ საქართველოს ფეხბურთის ფედერაციის პრეზიდენტობაზე უარი უთხრეს.

აშშ-ს სახაზინო დეპარტამენტმა სანქციები დაუწესა ბიძინა ივანიშვილს.

პარლამენტის წევრებსა და "ოცნების" რეპრესიულ მექანიზმში ჩართულ პირებს სანქციები დაუწესა ლიეტუვამ, ლატვიამ და ესტონეთმა.

კრიტიკული რეზოლუციის მიღების შემდეგ, “ქართულმა ოცნებამ” შეწყვიტა ევროსაბჭოს საპარლამენტო ასამბლეასთან მუშაობა.

მიმდინარე აქციების ფონზე, ივანიშვილის მთავრობამ ბოლო 1 თვეში 3 მილიონი ლარის ღირებულების სათვალთვალო კამერები შეიძინა.

"ოცნების" პარლამენტმა უწყვეტი საპროტესტო აქციების ფონზე მიიღო დრაკონული კანონები — გზის გადაკეტვა 5000 ლარით, ხოლო აქციაზე სახის დაფარვა და ლაზერის ტარება 2000 ლარით ჯარიმდება.

პარლამენტმა დაჩქარებული წესით მიიღო ცვლილებები საჯარო სამსახურის შესახებ არსებულ კანონში — საჯარო მოხელეობისთვის აღარ იქნება საჭირო სახელმწიფო ენის ცოდნა, 18 წლის ასაკის მიღწევა და მოხელის სერტიფიკატი. ცვლილებების საფუძველზე საჯარო სამსახურებში მალევე დაიწყო რეორგანიზაცია და თანამშრომელთა პოლიტიკური ნიშნით წმენდა.

აქციებზე დაკავებულ პოლიტპატიმართა რიცხვმა 50-ს გადააჭარბა. დაკავებულთა შორის არიან ჟურნალისტი მზია ამაღლობელი, მსახიობი ანდრო ჭიჭინაძე, იუმორისტი ონისე ცხადაძე, ექიმი გიორგი ახობაძე.

დიდი ბრიტანეთის თემთა პალატაში თოთხმეტმა დეპუტატმა შეიტანა ინიციატივა ბიძინა ივანიშვილის სანქცირების შესახებ.

აშშ-ის სახელმწიფო დეპარტამენტმა ქართველ სამართალდამცავებს, მუნიციპალური ხელისუფლების წარმომადგენლებსა და მათი ოჯახის წევრებს სავიზო შეზღუდვები დაუწესა.

დიდმა ბრიტანეთმა პოლიციის მაღალჩინოსნები, მათ შორის მინისტრი გომელაური დაასანქცირა. შინაგან საქმეთა მინისტრის გარდა, სანქცირებულთა შორისა არიან მინისტრის მოადგილე ალექსანდრე დარახველიძე, თბილისის პოლიციის დეპარტამენტის უფროსი სულხან თამაზაშვილი, განსაკუთრებულ დავალებათა დეპარტამენტის უფროსი ზვიად ხარაზიშვილი ("ხარება") და მისი მოადგილე მილერი ლაგაზაური.

"მაგნიტსკის" სიაში შეიყვანეს შს მინისტრი, ვახტანგ გომელაური და სპეცრაზმის უფროსის, "ხარებას" მოადგილე, მირზა კეზევაძე.

ერთპარტიული პარლამენტის წევრები, ირაკლი ზარქუა და ვიქტორ სანიკიძე ლაშა გაბიტაშვილზე თავდასხმის გამო აბუ-დაბიში დააკავეს და ჯარიმის გადახდის შემდეგ გამოუშვეს.

მაკა ბოჭორიშვილი და დოვლეტმირატ სეიტმამედოვი, თურქმენეთის ელჩი საქართველოში

მაკა ბოჭორიშვილი და დოვლეტმირატ სეიტმამედოვი, თურქმენეთის ელჩი საქართველოში

ფოტო: MFA Georgia

საგარეო საქმეთა არალეგიტიმური მინისტრმა, მაკა ბოჭორიშვილმა, რომელიც პოსტზე 2024 წლის 25 ნოემბერს დაინიშნა, ისეთ ქვეყნების წარმომადგენლებთან გამართა შეხვედრები, როგორებიცაა აზერბაიჯანი, თურქმენეთი, თურქეთი, არაბთა გაერთიანებული საემიროები.

შსს-მ 7-მილიონად შეიძინა სისტემა Cellebrite, რომელიც მობილურ მოწყობილობებზე თვალთვალისთვის გამოიყენება.

პარლამენტმა პოლიციის შესახებ არსებულ კანონში ცვლილებები შეიტანა, რომლის მიხედვითაც შინაგან საქმეთა მინისტრს უფლებამოსილება ენიჭება, პოლიციაში სამუშაოდ პირი სპეციალური კონკურსის გავლის გარეშე მიიღოს და საკუთარი ბრძანებით კონკურსის გარეშე პოლიციაში მიღების წესი და პირობები განსაზღვროს.

ლიეტუვამ საქართველოში ოცნების 17 მაღალჩინოსანს დაუწესა ინდივიდუალური სანქციები. მათ შორის — ირაკლი კობახიძეს, კახა კალაძეს, თეა წულუკიანის, ტვ "იმედის" მფლობელ ირაკლი რუხაძეს, მოსამართლეებს — ლევან მურუსიძეს, მიხეილ ჩინჩალაძეს, შალვა თადუმაძეს და სხვებს.

პარლამენტში დარეგისტრირდა "მედიის რეგულაციის კანონი", რომელიც დამოუკიდებელ მედიასაშუალებებს მაუწყებლობას მკაცრად შეუზღუდავს.

პარლამენტი "აგენტების" რუსული კანონის FARA-თი შეცვლის ინიციატივით გამოვიდა — იმის ფონზე, ორი წლის წინ კობახიძე FARA-ს აკრიტიკებდა და ამბობდა, რომ საქართველოში მსგავს კანონს არ მიიღებდნენ.

პარლამენტმა ჩამოაყალიბა ერთიანი ნაციონალური მოძრაობის საქმიანობის შემსწავლელი კომისია. კომისიის თავმჯდომარეა თეა წულუკიანი, მდივანი კი — სოზარ სუბარი.

"ოცნების" პარლამენტმა ამოიღო სიტყვა "გენდერი" კანონებიდან — ამიერიდან კანონებში მხოლოდ "ქალი" და "მამაკაცი" ეწერება.