გერმანიის საგარეო საქმეთა სამინისტრო X-ზე მხარდაჭერას უცხადებს ნეტგაზეთისა და ბათუმელების უკანონოდ დაკავებულ დამფუძნებელ მზია ამაღლობელს და ქართულ ოცნებას მისი დაუყოვნებლივ გათავისუფლებისკენ მოუწოდებს.

"ხვალ, ერთთვიანი პატიმრობის შემდეგ, ქართველი ჟურნალისტი მზია ამაღლობელი სასამართლოს წინაშე წარსდგება — ის დაუყოვნებლივ უნდა გათავისუფლდეს. ქართული ოცნება ჟურნალისტების, დემონსტრანტებისა და ოპოზიციის წინააღმდეგ დაშინების კამპანიას აგრძელებს. ჩვენ მხარს ვუჭერთ მათ, ვინც თავისუფლებას იცავს", — ვკითხულობთ სამინისტროს პოსტში.

4 მარტს, 14:00 საათზე ჩანიშნულია წინასასამართლო სხდომა მზია ამაღლებელის საქმეზე.

სხდომაზე მოსამართლე ვიქტორ მეტრეველმა უნდა გადაწყვიტოს მხარეების მიერ წარმოდგენილი მტკიცებულებების დასაშვებობის საკითხი და, გარდა ამისა, უნდა განიხილოს თუ არა ეს საქმე არსებითად სასამართლომ.

ვიქტორ მეტრეველი განიხილავს მზია ამაღლობელისთვის აღკვეთი ღონისძიების გამოყენების, შეცვლის ან გაუქმების შესახებ შუამდგომლობასაც.