ბრიტანეთის პრემიერმინისტრი სერ კირ სტარმერი და უკრაინის პრეზიდენტი ვოლოდიმირ ზელენსკი ერთმანეთს დღეს, 1 მარტს შეხვდებიან.

ვოლოდიმირ ზელენსკი ლონდონში დღეს ჩაფრინდა, გუშინ თეთრ სახლში სკანდალურად დასრულებული შეხვედრის შემდეგ.

ხვალ დიდი ბრიტანეთი ევროპელი ლიდერების სამიტს უმასპინძლებს, რომელზეც განხილული იქნება უკრაინაში რუსეთის აგრესიის დამთავრება, ისევე როგორც ევროპის თავდაცვის საკითხები ზოგად ჭრილში.

კირ სტარმერი დონალდ ტრამპს 27 თებერვალს შეხვდა და ეცადა, რომ გამოესწორებინა გაუცხოება, რომელიც ტრამპის ადმინისტრაციასა და ევროპულ სახელმწიფოებს შორის არსებობს უკრაინის კონფლიქტის ირგვლივ. სტარმერი ვოლოდიმირ ზელენსკისა და დონალდ ტრამპს მათი დაპირისპირების შემდეგაც ესაუბრა — ბრიტანეთის პრემიერმა ორივე ლიდერთან სატელეფონო საუბარი გამართა.

ინფორმაციისთვის, 28 თებერვალს, აშშ-ის პრეზიდენტ დონალდ ტრამპსა და ვოლოდიმირ ზელენსკის შორის შეხვედრა თეთრი სახლის "ოვალურ კაბინეტში" შედგა. შეხვედრას ესწრებოდა ამერიკის ვიცეპრეზიდენტი ჯეი დი ვენსიც, რომელიც დებატებში არაერთხელ ჩაერთო.

შეხვედრა, რომელსაც აშშ-სა და უკრაინას შორის იშვიათი მინერალების შეთანხმების ხელმოწერა უნდა მოჰყოლოდა, სკანდალურად დასრულდა, მას შემდეგ, რაც ვოლოდიმირ ზელენსკიმ აშშ-ის პრეზიდენტთან და ჯეი დი ვენსთან ცხარედ იკამათა და თეთრი სახლი კომენტარის გარეშე დატოვა. აშშ-ის ვიცე პრეზიდენტმა ვოლოდიმირ ზელენსკის მადლიერების არ გამოხატვაში დასდო ბრალი, ხოლო დონალდ ტრამპმა კი უკრაინის პრეზიდენტი ომის გაგრძელების სურვილში დაადანაშაულა.

შეხვედრის შემდეგ თეთრმა სახლმა გაავრცელა ინფორმაცია, რომ ტრამპისა და ზელენსკის პრესკონფერენცია გადაიდო და "მინერალების შეთანხმებას" აშშ-სა და უკრაინას შორის ხელი არ მოეწერა.