"მზია ამაღლობელის დარტყმის შედეგად მე მარჯვენა ლოყაზე და მარჯვენა ყურზე ვიზუალურად აღმენიშნება სიწითლე, დარტყმის დროს განვიცადე ტკივილი და თანახმა ვარ ჩამიტარდეს სასამართლო სამედიცინო ექსპერტიზა […] მზია ამაღლობელმა მე ხელით მომქაჩა პოლიციის ქურთუკზე, რა დროსაც ქურთუკი არ დაზიანებულა", – ვკითხულობთ ბათუმის პოლიციის უფროსის, ირაკლი დგებუაძის დაკითხვის ოქმში. ოქმის დეტალებზე ნეტგაზეთი წერს.

12 იანვარს, მზია ამაღლობელის დაკავებიდან მეორე დღეს, ირაკლი დგებუაძეს დაკითხვის ოქმი აჭარის პოლიციის დეპარტამენტის გამომძიებელმა, ანზორ ფუტკარაძემ შეადგინა. ოქმის მიხევდით, დგებუაძის გამოკითხვა საათსა და 15 წუთს გაგრძელდა, თუმცა მის მიერ გამომძიებლისთვის მიწოდებული ინფორმაცია მხოლოდ 1,5 გვერდია.

დგებუაძეს ჩვენება საქმეში დაკითხული ოთხი პოლიციელის ჩვენებას იდენტურად ემთხვევა. ოქმის მიხედვით, პოლიციელი 11 იანვარს, დღის მეორე ნახევარში, ბათუმის საქალაქო სასამართლოსთან მიმდინარე აქციაზე იმყოფებოდა “საზოგადოებრივი წესრიგის დაცვის მიზნით”. შემდეგ აქციის მონაწილეები მარშით გაემართნენ აჭარის პოლიციის დეპარტამენტისკენ.

ის ამტკიცებს, რომ პოლიციის შენობის შესასვლელთან მყოფი მოქალაქეების ნაწილის ქმედება "გასცდა პროტესტის გამოხატვის სამართლებრივ ჩარჩოებს", რის გამოც რამდენიმე მათგანი ადმინისტრაციული წესით დააკავეს. მათ შორის, მზია ამაღლობელი. სილის გაწვნასაც დგებუაძე ამ ადმინისტრაციულ დაკავებას უკავშირებს.

"ადმინისტრაციული დაკავებიდან გათავისუფლების შემდეგ ის შეუერთდა ქ. ბათუმში, ტბელ აბუსერიძის ქუჩაზე #11ა-ში მდებარე აჭარის ა/რ პოლიციის დეპარტამენტის შესასვლელთან გამართულ საპროტესტო აქციას. 2025 წლის 12 იანვარს, დაახლოებით 00:30 საათზე, აქციის მიმდინარეობისას, პოლიციის თანამშრომლების შეურაცხყოფისა და მათი კანონიერი მოთხოვნისადმი დაუმორჩილებლობის ფაქტზე დაკავებულ იქნა ორი პირი. აღნიშნული პირების დაკავების შესახებ განმარტებას ითხოვდნენ იქ შეკრებილი აქციის მონაწილეები, მათ შორის, ჩემ, ჩვენ მიერ ადმინისტრაციული წესით დაკავებული და შემდეგ ხელწერილის საფუძველზე გათავისუფლებული მზია ამაღლობელი.

მე მათ განვუმარტე, რომ ორმა ახალგაზრდა მამაკაცმა პოლიციის თანამშრომლებს მიაყენეს სიტყვიერი შეურაცხყოფა და ამ ქმედების გამო იყვნენ ისინი დაკავებული ადმინისტრაციული წესით. მას შემდეგ, რაც დავასრულე მზია ამაღლობელთან და მის გვერდით მყოფ ქალბატონთან საუბარი, შევბრუნდი აქციის მონაწილეების მიმართულებით, რა დროსაც მზია ამაღლობელმა მომქაჩა პოლიციის ქურთუკზე. მივბრუნდი მისკენ, რა დროსაც მან მოულოდნელად დამარტყა მარცხენა ხელი მარჯვენა სახეში, ლოყისა და ყურის არეში. ამ დროს ჩემ გვერდით იდგა შსს აჭარის ა/რ პოლიციის დეპარტამენტის საგამოძიებო სამმართველოს უფროსი, ბერდია ფერაძე და ბათუმის საქალაქო სამმართველოს უფროსის მოადგილე – გიორგი ბჟალავა, რომლებმაც მოახდინეს მზია ამაღლობელის დაკავება და სამმართველოს ეზოში შეყვანა," — ვკითხულობთ დგებუაძის ჩვენებაში.

ოქმში ასევე ვკითხულობთ, თუ როგორ ითხოვს დგებუაძე სამედიცინო ექსპერტიზას, რადგან მან სილის გაწვნისგან ფიზიკური ტკივილი განიცადა.

შეგახსენებთ, ბათუმელებისა და ნეტგაზეთის დამფუძნებელი, ჟურნალისტი მზია ამაღლობელი 11-12 იანვარს ორჯერ დააკავეს. პირველად სტიკერის გაკვრისთვის, რომელსაც ეწერა: "იფიცება საქართველო 15 იანვარს 15:00 საათზე". რამდენიმე საათში ჟურნალისტი გაათავისუფლეს. მალევე აჭარის პოლიციის მთავარ სამმართველოსთან მოულოდნელად ჩოჩქოლი ატყდა და მზია ამაღლობელი მეორედაც დააკავეს ორ სხვა პირთან ერთად.

ამაღლობელს ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. მუხლი 4-დან 7 წლამდე პატიმრობას ითვალისწინებს.

12 თებერვალს მზია ამაღლობელის ადვოკატებმა ჟურნალისტის მიმართ აღკვეთის ღონისძიების სახით გამოყენებული პატიმრობის გაუქმების მოთხოვნით შუამდგომლობა წარადგინეს, რაც სასამართლომ არ დააკმაყოფილა და ამაღლობელი პატიმრობაში დატოვა.