"არასდროს არცერთ ხელისუფლებას არ ვაფინანსებდით, ჩვენ ყოველთვის ვიყავით პოლიტიკურად ნეიტრალური და ყოველთვის ვართ ჩვენი ქვეყნის, საქართველოს მხარეს" — ამის შესახებ ბიზნესმენი სოსო ფხაკაძე და წერს და 9 იანვარს რადიო თავისუფლების მიერ გამოქვეყნებულ სტატიას ეხმაურება, სადაც ნათქვამია, რომ აშშ-ის მომდევნო სახელმწიფო მდივანს, მარკო რუბიოს კონგრესიდან გაუგზავნეს წერილი, სადაც მოცემული იყო 25 პირის სია, რომელთა დასანქცირებასაც წერილის ავტორები ითხოვდნენ.

ბიზნესმენი სოსო ფხაკაძე აშშ-ის შესაძლო სანქცირებულთა სიაში აღმოჩენაზე BMG-ს წერილით პასუხობს:

"პირველი, ეს ჰიპოთეტურ დონეზეც კი არის სრულიად უსამართლო და არაობიექტური ჩვენი ჯგუფის მიმართ და ეს ყველამ კარგად იცის, მათ შორის იმ ადამიანებმაც, ვინც მონაწილეობდა ამ პროცესში.

მეორე, პირველივე დღიდან, ბიზნეს საქმიანობას ვეწევით დასავლური ღირებულებებისა და ფასეულობების შესაბამისად და ამასაც ყველა გრძნობს და იცის, ვისაც ერთხელ მაინც ჰქონია შეხება ჩვენს ჯგუფში შემავალ რომელიმე კომპანიასთან.

მესამე, არასდროს არცერთ ხელისუფლებას არ ვაფინანსებდით და ესეც ყველამ იცის.

მეოთხე, ჩვენ ყოველთვის ვიყავით პოლიტიკურად ნეიტრალური და ყოველთვის ვართ ჩვენი ქვეყნის, საქართველოს მხარეს და ასე იქნება მომავალშიც. ამასთან, ვართ მსხვილი ბიზნესი და, ბუნებრივია, ყოველთვის გვქონდა და მომავალშიც გვექნება ნორმალური ურთიერთობა ხელისუფლებასთან და ეს მთელ მსოფლიოში ყველასთვის მარტივად გასაგები მოცემულობაა.

მეხუთე, 1998 წლიდან, ამერიკის შეერთებული შტატებია სწორედ ის ქვეყანა, რომელთანაც ყველაზე მჭიდრო კავშირები მაქვს. ამერიკის შეერთებულ შტატებში არის ჩემი 2 ალმა-მატერი.

ასევე, ამა წლის 29 იანვრიდან რამდენიმე კვირით ვიქნები ბოსტონში, ჩემს ყოფილ უნივერსიტეტში, სადაც 2023 წლიდან გავდივარ ახალ სასწავლო პროგრამას. ამას გარდა, წლების მანძილზე ვმუშაობდით ამ თემაზე და დღეს საქართველოში წარმოვადგენთ სამ, ძალიან ცნობილ, ძალიან წარმატებულ ამერიკულ ბრენდს (ვენდისი, დანკინი და საბვეი).

როგორც აღვნიშნე, ამ ყველაფრის გამო, ამერიკის შეერთებულ შტატებთან მაქვს მჭიდრო, ყოველკვირეული კავშირი და ესეც ყველამ იცის, ვინც მიცნობს. ვინც არ მიცნობს, გამიცნობს და მიხვდება. და ბოლოს, ბუნებრივია, ჩვენ მარტივად შევძლებთ დავიცვათ და დავამტკიცოთ ჩვენი სიმართლე ნებისმიერ დონეზე აღნიშნულის საჭიროების შემთხვევაში," — წერს სოსო ფხაკაძე წერილში.

აშშ-ში, სავარაუდოდ, მარკო რუბიოსთვის გაგზავნილ წერილს და 25-კაციან დასასაანქცირებელ პირთა სიაში მოხვედრას უკვე გამოეხმაურნენ ბიზნესმენები ნოშრევან ნამორაძე და ირაკლი რუხაძე და ჰოლდინგური კომპანია საქართველოს კაპიტალი. ამ უკანასკნელის განცხადება დაკავშირებული იყო ამავე სიაში საქართველოს კაპიტალის დირექტორთა საბჭოს თავმჯდომარისა და აღმასრულებელი დირექტორის, ირაკლი გილაურის მოხვედრასთან.