საქართველოს კაპიტალის დირექტორთა საბჭო რადიო თავისუფლების მიერ 9 იანვარს გავრცელებულ სტატიას ეხმაურება, სადაც ნახსენები იყო, რომ აშშ-ის კონგრესის წევრებმა აშშ-ის ახალ ადმინისტრაციას, კერძოდ — აშშ-ის მომდევნო სახელმწიფო მდივანს, მარკო რუბიოს გაუგზავნეს წერილი, სადაც მოცემულია 25 პირისგან შემდგარი სია, რომელთა დასანქცირებასაც კონგრესმენები მოითხოვდნენ და ამ ადამიანებს შორისაა საქართველოს კაპიტალის დირექტორთა საბჭოს თავმჯდომარე და აღმასრულებელი დირექტორი ირაკლი გილაური.

საქართველოს კაპიტალის დირექტორთა საბჭო წერს, რომ დირექტორთა საბჭოს არ გააჩნია ინფორმაცია ზემოაღნიშნული სიის წარმომავლობასთან დაკავშირებით. თუმცა, ისინი აშშ-ის ოფიციალურ პირებთან გარემოებების გასარკვევად აქტიურად მუშაობენ.

"დირექტორთა საბჭოს არ გააჩნია ინფორმაცია ზემოაღნიშნული სიის წარმომავლობასთან დაკავშირებით. თუმცა, დირექტორთა საბჭო აქტიურად მუშაობს აშშ-ის ოფიციალურ პირებთან გარემოებების გარკვევის მიზნით. საქართველოს კაპიტალი არის ლონდონის საფონდო ბირჟაზე განთავსებული საჯარო კომპანია და მის ძირითად აქციონერებს ამერიკის შეერთებული შტატების და ევროპის ინსტიტუციური ინვესტორები წარმოადგენენ. ირაკლი გილაურის ხელმძღვანელობით კომპანია იმართება კორპორაციული მართვის უმაღლესი სტანდარტების შესაბამისად. ჩვენ გვაკისრია პასუხისმგებლობა პირთა საკმაოდ ფართო წრის მიმართ და შესაბამისად, ჩვენი კომპანიის პოლიტიკა ყოველთვის ითვალისწინებდა ქვეყნის პოლიტიკურ პროცესში ჩაურევლობას.

დირექტორთა საბჭოს გააჩნია სრული ნდობა ირაკლი გილაურისადმი და არ ეთანხმება არანაირ მოსაზრებას, რომლის მიხედვითაც აშშ-ის ან ნებისმიერი სხვა ქვეყნის მთავრობა შესაძლოა განიხილავდეს მის წინააღმდეგ რაიმე მოქმედების განხორციელებას. ჩვენ დარწმუნებული ვართ, რომ შესაბამისი ინფორმაციის წარდგენისა და განხილვის შედეგად, ნებისმიერი უფლებამოსილი ორგანო გაიზიარებს ჩვენს შეხედულებას.

საქართველოს კაპიტალი აგრძელებს კორპორაციული მართვის უმაღლესი სტანდარტებით მოქმედებას და მიმართავს ყველა საჭირო ზომას კომპანიისა და ირაკლი გილაურის მიმართ დაუსაბუთებელ ბრალდებებზე საპასუხოდ", — ნათქვამია გავრცელებულ განცხადებაში.

წერილს ხელს აწერენ: საქართველოს კაპიტალის სამეთვალყურეო საბჭოს წევრები: დევიდ მორისონი, მასიმო გესუას სალვადორი, მარია ჩატი-გოტიე და ნილ ჯანინი.

ცნობისათვის, სს საქართველოს კაპიტალი დიდ ბრიტანეთში საფონდო ბირჟაზე განთავსებული Georgia Capital PLC-ის (Ticker: CGEO) 100%-იანი შვილობილი კომპანიაა. GCAP ახორციელებს ინვესტიციებს საქართველოში ქართული ეკონომიკის სხვადასხვა სექტორებში. საქართველოს კაპიტალის დივერსიფიცირებული პორტფელი აერთიანებს: საბანკო, წყალმომარაგების, ჯანდაცვის, საცალო ვაჭრობის (ფარმაციის), განახლებადი ენერგიის, სადაზღვევო, საგანმანათლებლო და სხვა სექტორებში არსებულ წამყვან ბიზნესებს.

რადიო თავისუფლების მიერ ზემოთ ხსენებული წერილის შესახებ ინფორმაციის გავრცელების შემდეგ, საზოგადოების ნაწილში ბევრი კითხვა გაჩნდა. მათი ნაწილი რამდენიმე დღეა ითხოვდა, რომ კომპანია Reformatics-ის დამფუძნებელ ნიკა გილაურს გაეკეთებინა განმარტება, რატომ აღმოჩნდა აღნიშნულ სიაში მისი ძმა, საქართველოს კაპიტალის დირექტორთა საბჭოს თავმჯდომარე და აღმასრულებელი დირექტორი ირაკლი გილაური, მაშინ როცა ის იმ ფონდის დამფუძნებელია, რომელიც პროევროპულ აქციაზე დაშავებულ პირებს და მათ ოჯახებს ეხმარება.

"ნიკა გილაურის ფონდის რიგში მდგომებიდან რამე კომენტარი არის მისი ძმის, ირაკლი გილაურის სანქციების სიაში ყოფნასთან დაკავშირებით?" — კითხულობს აქტივისტი დოდი ხარხელი სოციალურ ქსელში.

ამ დრომდე ნიკა გილაურს აღნიშნულთან დაკავშირებით კომენტარი არ გაუკეთებია.