რუსეთის საგარეო საქმეთა სამინისტრო თქმით, აშშ-მა სან-ფრანცისკოში საკონსულოსა და ვაშინგტონში სავაჭრო წარმომადგენლობის რუსეთის კუთვნილი შენობები "მიიტაცა".

საგარეო უწყების განცხადებით, ეს ჰგავს წინა წლის დეკემბერში ნიუ-იორკსა და ვაშინგტონთან ახლოს რუსეთის კუთვნილი დიპლომატიური საცხოვრებლების მითვისებას, სადაც ახლა აშშ-ის სპეცსამსახურები შეიარაღებული პოლიციის მხარდაჭერით იმყოფებიან:

"მომხდარს ვაფასებთ, როგორც ღია მტრულ აქტს, ვაშინგტონის მიერ საერთაშორისო სამართლის უხეშ დარღვევად, მათ შორისაა, ვენის კონვენცია დიპლომატიურ და საკონსულო ურთიერთობების შესახებ და ორმხრივი საკონსულო კონვენცია".

რუსეთის საგარეო უწყება მოუწოდებს, აშშ-ის მთავრობას "დაუყოვნებლივ დააბრუნოს რუსული ობიექტები":

"წინააღმდეგ შემთხვევაში ქვეყნებს შორის ურთიერთობების დეგრადაციის გაგრძელება შეერთებულ შტატებს დაედება ბრალად, მაშინ როდესაც ჩვენზე დიდადაა დამოკიდებული გლობალური სტაბილურობა და საერთაშორისო უსაფრთხოება".

აშშ-მა რუსეთს სან-ფრანცისკოში გენერალური საკონსულოს დახურვა მოსთხოვა. ამასთანავე, ამერიკის მხარის მოთხოვნით ნიუ-იორკსა და ვაშინგტონში 2 სექტემბრამდე უნდა დახურულში რუსეთის ორი სავაჭრო წარმომადგენლობა. მათი ინფორმაციით, აშშ რუსი დიპლომატების ქვეყნიდან გაძევებას არ აპირებს. რუსეთს შეუძლია არსებული შენობები საკუთრებაში დაიტოვოს, მაგრამ მათ დიპლომატიური მისიებისთვის ვერ გამოიყენებს.

28 ივლისს რუსეთმა აშშ-ში დიპლომატიური მისიის წარმომადგენლობის შემცირება მოსთხოვა. საუბარია 755 დიპლომატზე, რომელთა რაოდენობაც 455-მდე უნდა შეიკვეცოს. როგორც მოსკოვმა განაცხადა, აშშ-ში სწორედ ამდენი რუსი დიპლომატი მუშაობს.

მოსკოვის მოთხოვნა იყო საპასუხო დარტყმა აშშ-ს ახალ სანქციებზე, რომელსაც ამერიკის პრეზიდენტმა, დონალდ ტრამპმა საბოლოოდ ორ აგვისტოს მოაწერა ხელი.

23 აგვისტოს აშშ-ის დიპლომატიურმა მისიამ რუსეთში განაცხადა, რომ რუსეთის მასშტაბით არასაიმიგრაციო ვიზების გაცემას განუსაზღვრელი დროით წყვეტდა. განცხადების მიხედვით, ეს გადაწყვეტილება რუსეთის მიერ აშშ-ის დიპლომატების რიცხვის შემცირების გამოა მიღებული.