აშშ-მა რუსეთს სან-ფრანცისკოში გენერალური საკონსულოს დახურვა მოსთხოვა, წერს BBC. ამასთანავე, ამერიკის მხარის მოთხოვნით ნიუ-იორკსა და ვაშინგტონში უნდა დაიხუროს რუსეთის ორი სავაჭრო წარმომადგენლობა.

სახელმწიფო დეპარტამენტში განაცხადეს, რომ სამივე წარმომადგენლობის დახურვა შაბათს უნდა დასრულდეს. მათი ინფორმაციით, აშშ რუსი დიპლომატების ქვეყნიდან გაძევებას არ აპირებს. რუსეთს შეუძლია არსებული შენობები საკუთრებაში დაიტოვოს, მაგრამ მათ დიპლომატიური მისიებისთვის ვერ გამოიყენებს.

რუსეთის საგარეო უწყების ცნობით, აშშ-ის გენერალური მდივანი რუსეთის საგარეო მინისტრს, სერგეი ლავროვს დაუკავშირდა და დიპლომატიური საქმიანობის დამატებითი შეზღუდვები გააცნო.

საპასუხოდ ლავროვმა "მწუხარება გამოთქვა" იმის გამო, რომ ორ ქვეყანას შორის "ურთიერთობა დაიძაბა" და მოსკოვი ყურადღებით შეისწავლის ახალ რეგულაციებს და რეაქციის შესახებ განაცხადებს.

28 ივლისს რუსეთმა აშშ-ში დიპლომატიური მისიის წარმომადგენლობის შემცირება მოსთხოვა. საუბარია 755 დიპლომატზე, რომელთა რაოდენობაც 455-მდე უნდა შეიკვეცოს. როგორც მოსკოვმა განაცხადა, აშშ-ში სწორედ ამდენი რუსი დიპლომატი მუშაობს.

მოსკოვის მოთხოვნა იყო საპასუხო დარტყმა აშშ-ს ახალ სანქციებზე, რომელსაც ამერიკის პრეზიდენტმა, დონალდ ტრამპმა საბოლოოდ ორ აგვისტოს მოაწერა ხელი.

23 აგვისტოს აშშ-ის დიპლომატიურმა მისიამ რუსეთში განაცხადა, რომ რუსეთის მასშტაბით არასაიმიგრაციო ვიზების გაცემას განუსაზღვრელი დროით წყვეტდა. განცხადების მიხედვით, ეს გადაწყვეტილება რუსეთის მიერ აშშ-ის დიპლომატების რიცხვის შემცირების გამოა მიღებული.