ახალგაზრდა იურისტთა ასოციაციის თავმჯდომარის მოადგილე თამარ ონიანი სოციალურ ქსელში განმარტავს, რატომ არღვევს საპროტესტო აქციებზე ნიღბების აკრძალვა ადამიანის უფლებებს.

იურისტი რამდენიმე არგუმენტს ასახელებს, რის საფუძველზეც აცხადებს , რომ ასეთი საკანონმდებლო რეგულაციები ადამიანის გამოხატვის თავისუფლებას ეწინააღმდეგება და ავტორიტეტული ორგანიზაციების მიერ შეფასებულია, როგორც შეკრების თავისუფლების არაპროპორციული შეზღუდვა.

"ნიღაბი (მაგ. სამედიცინო) არის ჯანმრთელობის დაზიანებისგან თავის დაცვის ინსტრუმენტი, მაშინ, როდესაც ვირუსების სეზონია, და ასევე, როდესაც შსს უკანონოდ და არაპროპორციულად დიდი ოდენობით იყენებს სხვადასხვა ქიმიურ ნივთიერებას, რომლის შედეგებზეც უკვე ათეულობით დემონსტრანტი საუბრობს.
შესაბამისად, ნიღბის აკრძალვა ადამიანს ავტომატურად აყენებს არჩევანის წინაშე: შეკრების თავისუფლებაში გადაიხადოს საკუთარი ჯანმრთელობის ფასი.
მშვიდობიანი დემონსტრანტები ნიღბებს იყენებენ შემდგომი რეპრესიული ზომებისგან დასაცავად, რაც ლეგიტიმური მიზანია. მაგ. უკვე ვნახეთ რაც მოყვა საჯარო მოხელეების პროტესტს (მზარდი რეპრესიები მათზე).
შესაბამისად, ნიღბის აკრძალვა ადამიანს ავტომატურად აყენებს არჩევანის წინაშე: შეკრების თავისუფლებაში გადაიხადოს საკუთარი სამსახურის, კეთილდღეობის ფასი.
სახის სრულად ან მისი ნაწილის დაფარვა შეიძლება იყოს გამოხატვის ფორმა, რომელიც დაცულია სიტყვისა და შეკრების თავისუფლებით.
ბლანკეტური აკრძალვა არ შეესაბამება თანაზომიერების პრინციპს, რომელიც დაცულია საქართველოს კონსტიტუციითა და საერთაშორისო ხელშეკრულებებით.
გაჩნდება კითხვა, აბა, როდის არის ასეთი აკრძალვა ნებადართული. აქაც არსებობს პასუხი:
ნიღბის ტარება არ უნდა აიკრძალოს, თუ არ არსებობს ძალადობის მყისიერი და აშკარა მტკიცებულება.
ასეთი არ არსებობს, რადგან აქციები მშვიდობიანია (the overwhelming majority of demonstrators were peaceful ეუთოს შეფასება 30 ნოემბრის ყველაზე მძიმე დარბევის ღამეს, IRCT-OMCT შეფასება: ნაწამები ადამიანებისთვის მიყენებული დაზიანებები არ ავლენს ორმხრივი ბრძოლის კვალს).
ვინ ადასტურებს ამ არგუმენტების სისწორეს:
ვენეციის კომისიის შეფასება:
მსგავსი აკრძალვები სხვა ქვეყნებში (მაგ. რუსეთი) შეფასდა, როგორც შეკრების თავისუფლების არაპროპორციული შეზღუდვა.
ევროპული სასამართლოს პრაქტიკა:
საქმეზე Ibragimova v. Russia, სასამართლომ დაადგინა, რომ ნიღბის ტარებაზე ბლანკეტური აკრძალვა არღვევს გამოხატვისა და შეკრების თავისუფლებას.
დღეიდან სახის დაფარვა შეკრება/მანიფესტაციის დროს გამოიწვევს 2000 ლარიან ჯარიმას,"— წერს თამარ ონიანი.