პირველ დეკემბერს შევიტყვეთ, რომ ლიეტუვა, ლატვია და ესტონეთი სანქციებს უწესებს მათ, ვინც "ახშობს ლეგიტიმურ პროტესტს საქართველოში".

ამის საპასუხოდ საქართველოს საგარეო საქმეთა სამინისტროში ლიეტუვისა და ესტონეთის საგანგებო, სრულუფლებიანი ელჩები, ასევე ლატვიის საელჩოს საქმეთა დროებითი რწმუნებული დაიბარეს. ესენი არიან დარიუს ვიტკაუსკასი, მარგე მარდისალუ-კაჰარი და ლოლიტა ლენკევიჩი. ამის შესახებ თავად სამინისტრო წერს.

"შეხვედრაზე შეშფოთება გამოითქვა სამი ქვეყნის მიერ, საქართველოს ხელისუფლების ხელმძღვანელი პირებისა და სამართალდამცველების დასანქცირების შესახებ გაკეთებული განცხადების გამო. აღინიშნა, რომ ეს ნაბიჯი არ შეესაბამება ქვეყნებს შორის პარტნიორული ურთიერთობების ჩარჩოებს", — ნათქვამია საგარეო საქმეთა სამინისტროს განცხადებაში.

მათი მოხსენებით, შეხვედრაზე აღინიშნა, რომ საქართველო საერთაშორისო ნორმების ერთგულია და ქვეყნის სახელმწიფო ორგანოები კონსტიტუციისა და საერთაშორისო სტანდარტების შესაბამისად მოქმედებენ და "მიუღებელია განცხადებები, რომელიც მიმართულია სუვერენული სახელმწიფოს ინსტიტუტების საქმიანობაზე ზემოქმედების მოხდენისკენ და აღიქმება, როგორც ქვეყნის შიდა საქმეებში ჩარევა".

საგარეო საქმეთა სამინისტრო აღნიშნულ განცხადებაშიც ცდილობს იმის დამტკიცებას, რომ "ქართული ოცნების" მხრიდან ევროკავშირთან მოლაპარაკებების შეჩერება "არ ნიშნავს საქართველოს ევროკავშირში ინტეგრაციის პროცესის შეწყვეტას".

"შეხვედრაზე კიდევ ერთხელ გაესვა ხაზი, რომ საქართველოს ხელისუფლების გადაწყვეტილება, ევროკავშირთან ურთიერთობების დღის წესრიგში 2028 წლამდე არ დააყენოს ევროკავშირის წევრობაზე მოლაპარაკებების გახსნის საკითხი და უარი თქვას ევროკავშირის საბიუჯეტო გრანტებზე, არ ნიშნავს საქართველოს ევროკავშირში ინტეგრაციის პროცესის შეწყვეტას და მიზნად ისახავს აღნიშნულ საკითხზე მიმდინარე დამაზიანებელი სპეკულაციების აღკვეთას", — ნათქვამია უწყებაში.

განცხადების სრული ვერსიის ხილვას საგარეო საქმეთა სამინისტროს ვებგვერდზე შეძლებთ.