გუშინ დაწყებული საპროტესტო აქციების კვალდაკვალ საგარეო საქმეთა სამინისტრო ყურადღების ცენტრში მოექცა. საგარეო უწყების თანამშრომლებისგან საზოგადოება მოითხოვდა კომენტარის გაკეთებას ქართული ოცნების გადაწყვეტილებაზე, რომლის თანახმადაც საქართველომ ევროკავშირში გაწევრების საკითხზე მოლაპარაკებების გახსნის თემა დღის წესრიგიდან 2028 წლამდე ამოიღო. სწორედ საგარეო საქმეთა სამინისტროს თანამშრომლები იყვნენ საჯარო მოხელეებს შორის ერთ-ერთი პირველი, რომლებმაც ერთობლივი განცხადება გამოაქვეყნეს.

"მიგვაჩნია, რომ 2028 წლამდე ევროკავშირში გაწევრიანების მოლაპარაკებების გახსნის ამოღება პოლიტიკური დღის წესრიგიდან წინააღმდეგობაში მოდის საქართველოს კონსტიტუციის 78-ე მუხლის მოთხოვნებთან", — ვკითხულობთ განცხადებაში.

მოგვიანებით, განცხადებას შეუერთდა არაერთი მაღალი რანგის დიპლომატიც. თანამდებობა დატოვა ბულგარეთში საქართველოს ელჩმა ოთარ ბერძენიშვილმა და ამის შესახებ საზოგადოებას X-ის პოსტით ამცნო.

ევროინტეგრაციის შეჩერების შესახებ ქართული ოცნების გადაწყვეტილებას გაემიჯნა ჩინეთში საქართველოს სრულუფლებიანი დესპანი მამუკა ციხელაშვილი.

ერთ-ერთი პირველი მიმდინარე მოვლენებს გამოეხმაურა საქართველოს ელჩი კორეის რესპუბლიკაში — თარაშ პაპასქუა.

"დღეს, როცა რუსეთი:

— აგრძელებს ჩვენი ქვეყნის 20%-ის ოკუპაციას;

— აწარმოებს დამანგრეველ ომს უკრაინის წინააღმდეგ;

— ებრძვის ევროპას, დემოკრატიულ სამყაროს და საფრთხეს უქმნის გლობალურ უსაფრთხოებას...

ჩვენ, როგორც არასდროს, გვჭირდება მეტი #ევროპა და მეტი #ნატო; გვჭირდება მეტი სოლიდარობა და თავისუფალი სამყაროს გვერდში დგომა!!," — წერდა თარაშ პაპასქუა.

იმ დიპლომატებს შორის, რომლებმაც გააპროტესტეს ოცნების გადაწყვეტილება, არიან საქართველოს დესპანი სომხეთში, გიორგი ჩხეიძე და საქართველოს ელჩი ჩეხეთში, თეა მაისურაძე.