დღეს მსოფლიოს სხვადასხვა ქვეყნის ლიდერები ბაქოში, გაეროს კლიმატის ცვლილების 29-ე კონფერენციაზე (COP29) იკრიბებიან. კონფერენცია კლიმატის ცვლილებების პრობლემებს შეეხება, რომელიც ბოლო პერიოდში ყურადღების ცენტრში მოექცა ესპანეთში მომხდარი დამანგრეველი წყალდიდობების გამო.

კონფერენციის საკვანძო საკითხი იმის გადაწყვეტაა, როგორ მიეწოდოთ შედარებით ღარიბ ქვეყნებს თანხები იმისათვის, რომ სათბური აირების გამოყოფა მინიმუმამდე შეამცირონ.

კლიმატურ ცვლილებებზე გლობალური შეთანხმების მიღწევას ომებთან და ეკონომიკურ სირთულეებთან ერთად აშშ-ის პრეზიდენტად დონალდ ტრამპის არჩევაც ართულებს, რომელიც კლიმატის ცვლილებებთან ბრძოლის ცნობილი სკეპტიკოსია. შესაბამისად, კონფერენციას არაერთი მნიშვნელოვანი ლიდერი არ ესწრება, მათ შორის აშშ-ის პრეზიდენტი ჯო ბაიდენი, ჩინეთის კომუნისტური პარტიის თავმჯდომარე სი ძინპინი, საფრანგეთის პრეზიდენტი ემანუელ მაკრონი, ევროკომისიის პრეზიდენტი ურსულა ფონ დერ ლაიენი, ინდოეთის პრემიერმინისტრი ნარენდრა მოდი და გერმანიის კანცლერი ოლაფ შოლცი.

კონფერენციას ჩრდილს აყენებს მისი მასპინძლის ვინაობაც — აზერბაიჯანს ადამიანის უფლებების დარღვევის არაერთ საქმეში ადანაშაულებენ.

კონფერენციას დაესწრება საქართველოს დელეგაცია, რომელსაც პრემიერმინისტრი ირაკლი კობახიძე უხელმძღვანელებს.