Paramount Pictures-მა Universal Pictures ბრძოლაში დაამარცხა და უოლტერ ისააკსონის წიგნის ეკრანიზაციის გადაღების უფლება მოიპოვა, რომელიც ლეონარდო და ვინჩის შესახებ იქნება. ფილმში მთავარ როლს ოსკაროსანი მსახიობი, ლეონარდო დიკაპრიო შეასრულებს.

აღსანიშნავია ისიც, რომ მთავარი როლის გარდა, ლეონარდო ამ ფილმის პროდიუსერიც იქნება ჯენიფერ დევისონთან ერთად.

ისააკსონი, რომელიც ძირითადად ბიოგრაფიებს წერს, New York Times-ის ბესტელერი ავტორების სიაში რამდენჯერმე მოხვდა, მათ შორის ლეონარდოს შესახებ დაწერილი წიგნითაც. მას ასევე ეკუთვნის წიგნები ალბერტ აინშტაინზე, სტივ ჯობსზე, ბენჯამინ ფრანკლინზე და სხვა.

ფილმის გადაღებები 2017 წლის ოქტომბერში დაიწყება.

რაც შეეხება დიკაპრიოს სხვა პროექტებს, სულ მალე ოსკაროსანი მსახიობი National Geographic-თან ერთად ამერიკის ასტრონავტიკის ისტორიაზე სერიალის პროდიუსერი იქნება.

ახალ შოუს ტომ ვულფის წიგნის კოსმოსისათვის ბრძოლა მიხედვით გადაიღებენ.

ამავდროულად მარტინ სკორსეზე და ლეონარდო დიკაპრიო ისეც ერთიანდებიან. რეჟისორი მსახიობს ახალ ფილმში Killers Of The Flower Moon გადაიღებს, რომელიც ამავე სახელწოდების ნამდვილ ამბავზე დაფუძნებული კრიმინალური რომანის ეკრანიზაცია იქნება.

სულ მალე ლეონარდოს მონაწილეობით კიდევ ერთ ფილმს ვიხილავთ სახელწოდებით - შავი ხელი, რომელიც სტეფან ტოლთის წიგნის ეკრანიზაციაა.