დღეს თბილისში "ქართული ოცნების" ახალი წინასაარჩევნო ბანერები გამოჩნდა, რომელზეც მმართველი პარტია თავის ამომრჩევლებს ორ ალტერნატივას სთავაზობს. აირჩიე "მშვიდობა" ან "ომი". ბანერების სერია არჩევანის წინაშე გვაყენებს და გვაჩვენებს, ერთი მხრივ, რუსეთის სამხედრო ძალის მიერ დანგრეულ უკრაინულ ტაძრებსა და სახლებს, მეორე მხრივ კი საქართველოს "მშვიდობიან" ეკლესიებსა და ინფრასტრუქტურას.

ოცნების შეულამაზებელმა პროპაგანდამ ცალსახად დაგვანახა, რომ პარტია აღარ ერიდება უკრაინის მიმართ განმკიცხველი განცხადებების გაკეთებას, რითაც შეურაცხყოფას არა მხოლოდ საქართველოს მეგობარ ქვეყანას, არამედ თავისივე მოქალაქეებსაც აყენებს — მათ, ვინც საკუთარი თვალით იხილა რუსეთის აგრესიის შედეგები და ვისაც ზუსტად ისე დაუნგრიეს სახლები თუ ტაძრები, როგორც უკრაინელებს.

რადგან ოცნება ბანერებისთვის აშკარად ახალი იდეების ძიებაშია, გვსურს, ჩვენი "მშვიდობიანი" ქვეყნის კეთილდღეობის დამადასტურებელი ფაქტები შევაშველოთ.

1. შუქრუთი "მშვიდობიან" ქვეყანაში

ოცნების პატრონაჟით კომპანია "ჯორჯიან მანგანეზი" უკვე 5 წელია ძირს უთხრის სოფელ შუქრუთს. შუქრუთელებს ენგრევათ სახლები, ხელიდან ეცლებათ საარსებოდ აუცილებელი რესურსები, შიმშილობენ, პირებს იკერავენ, თუმცა სახელმწიფო მათ არსებობას არ იმჩნევს.

2. საპროტესტო აქცია "მშვიდობიან" ქვეყანაში

ოცნების მაღალჩინოსნები საპროტესტო აქციებზე საუბრისას ხშირად იწონებენ თავს "ევროპულზე მაღალი სტანდარტებით" მოქმედებით. შსს-ს მშვიდობისმოყვარე ხერხების თვალსაჩინოებისთვის, გულწრფელად ვთავაზობთ აქციების "მშვიდობიანად" დარბევის ამსახველი ფოტომასალის გამოყენებას.

3. პოლიტიკური ლიდერის გამოსვლა "მშვიდობიან" ქვეყანაში

ეჭვიც არ გვეპარება, რომ ბიძინა ივანიშვილს ყველაზე კარგად ესმის მშვიდობის ფასი და, ასევე, ყველაზე მეტად ეშინია ომის. ალბათ, სწორედ ამიტომ დააქვს თან მობილური "აკვარიუმი".

4. გელათი "მშვიდობიან" ქვეყანაში

უკრაინაში ტაძრები პუტინის დავალებით ინგრევა, საქართველოში — ხელისუფლების გულგრილობით. ომსა და "მშვიდობას" შორის განსხვავების საჩვენებლად ეს ბანერიც გამოგვადგება.

5. ავტობუსის გაჩერება "მშვიდობიან" ქვეყანაში

ოცნება "მშვიდობიან" ქვეყანაში გვაცხოვრებს, რაც პირდაპირ აისახება ჩვენს ინფრასტრუქტურაზე, საზოგადოებრივ ტრანსპორტზე, ცხოვრების ხარისხზე — აი, მაგალითად, ამ ავტობუსის გაჩერებაზე.

ოცნების ბანერები აშკარა დემონსტრაციაა იმ ფაქტისა, რომ მთავრობა განზრახ აიგნორებს ქვეყანაში არსებულ უამრავ სოციალურ, ეკონომიკურ, პოლიტიკურ პრობლემას და თავისუფლებისთვის მებრძოლი უკრაინის დემონიზებას ცდილობს. ჩვენი "მშვიდობა" სრული ილუზიაა იქამდე, სანამ ადამიანებს საოკუპაციო ძალები იტაცებენ, ავიწროებენ, სანამ ემიგრაციის მაჩვენებელი ყოველწლიურად იზრდება და მოქალაქეების უსაფრთხოება საფრთხის ქვეშაა.შესაბამისად, დღეს ჩვენი “მშვიდობით” სიამაყე საფუძველს მოკლებულია.