ამერიკის პრეზიდენტობის კანდიდატებმა გუშინ საჯარო დებატები გამართეს, რის შემდეგაც მეგავარსკვლავმა ტეილორ სვიფტმა ინსტაგრამზე განცხადება გამოაქვეყნა. მომღერალმა დემოკრატთა პარტიის კანდიდატს, კამალა ჰარისს მხარდაჭერა გამოუცხადა.

"2024 წლის საპრეზიდენტო არჩევნებში ხმის მიცემას კამალა ჰარისისა და ტიმ უოლცისთვის ვაპირებ. კამალა ჰარისს ხმას ვაძლევ, რადგან იმ უფლებებისა და საკითხების გადაჭრისთვის იბრძვის, რომელსაც მებრძოლის სულისკვეთება სჭირდება. ვფიქრობ, რომ ის აუღელვებელი, ნიჭიერი ლიდერია და მჯერა, რომ ეს ქვეყანა უფრო მეტს მიაღწევს, თუ სიმშვიდე გვიხელმძღვანელებს და არა ქაოსი. გული ამიჩუყა და გამაოცა იმან, რომ პარტნიორად ჰარისმა ტიმ უოლცი აირჩია, რომელიც უკვე ათწლეულებია, მხარს უჭერს ლგბტ უფლებებს, ხელოვნურ განაყოფიერებას, და ქალთა სხეულებრივ დამოუკიდებლობას," — დაწერა ტეილორმა.

ფოტო: Getty Images

სვიფტმა განცხადებას ხელი მოაწერა, როგორც "უშვილო, კატების მოყვარულმა ქალმა" (Childless Cat Lover), რითაც პასუხი გასცა ტრამპის ვიზე-პრეზიდენტობის კანდიდატის, ჯეიდი ვენსის ქალებისკენ მიმართულ სექსისტურ კომენტარს.

მის განცხადებას დონალდ ტრამპის აქტიური მხარდამჭერი, მილიარდერი ილონ მასკი გამოეხმაურა და მომღერალს საკმაოდ შეურაცხმყოფელი ტონით მიმართა:

"კარგი, ტეილორ... გაიმარჯვე... მე შენ შვილს გაჩუქებ და შენს კატებს ჩემი სიცოცხლის სანაცვლოდაც დავიცავ" — დაწერა Tesla-ს და SpaceX-ის მფლობელმა.

მასკმა კიდევ უფრო აშკარად დაუჭირა მხარი ტრამპის პოლიტიკას და ამ კომენტარით სვიფტის შეურაცხყოფა სცადა, თუმცა, როგორც ჩანს, მისი კომენტარების მიუხედავად, სვიფტის განცხადებამ ჰარისის პოპულარობაზე 1 დღეზე ნაკლებ დროში უდიდესი გავლენა მოახდინა.