მიუხედავად იმისა, რომ მენტალური ჯანმრთელობისა და ხელოვნური ინტელექტის ურთიერთდამოკიდებულებაზე ძირითადად ნეგატიურ კონტექსტში ვიგებთ, ხშირად AI-ს ადამიანების ცხოვრებაში გადამრჩენელი ფაქტორის როლის შესრულებაც შეუძლია.

ინდოეთის ერთ-ერთ დიდ ქალაქში, ლაკნაუში, მეტას ხელოვნურმა ინტელექტმა ადგილობრივ პოლიციას შეატყობინა, რომ ახალგაზრდა ქალი თავის მოკვლას აპირებდა და ის გადაარჩინა.

23 წლის ქალმა სუიციდის წერილის მსგავსი შინაარსის ვიდეო ფეისბუქზე განათავსა. ვიდეოში ჩანს, რომ მას ყელზე თოკი აქვს შემოხვეული. როგორც ირკვევა, ქალის პოტენციური სუიციდის მიზეზი მისი ქმარი იყო — რამდენიმეთვიანი თანაცხოვრების შემდეგ კაცმა ის მიატოვა.

ვიდეოს ფეისბუქზე განთავსების შემდეგ მეტას ხელოვნურმა ინტელექტმა საფრთხის ამოიცნო და ლაკნაუს პოლიციის სოციალური მედიის ცენტრს შეტყობინება გაუგზავნა, რომელმაც ოფიცრებს ქალის ზუსტი ადგილმდებარეობის შესახებ ამცნო.

სასწრაფო შეტყობინების მიღების შემდეგ პოლიციამ უსწრაფესად იმოქმედა — ქალის ადგილოსამყოფელთან ყველაზე ახლოს მყოფმა ქალმა ოფიცერმა მას მიაკითხა და დაელაპარაკა იქამდე, სანამ ყელიდან თოკი არ მოიშორა. ლაკნაუს პოლიციის ცნობით, ქალი აღრიცხვაზე ჰყავთ და მის მდგომარეობას მუდმივად ამოწმებენ.

მეტას გარდა, სოციალურ ქსელებში სუიციდური კონტენტის შესამოწმებლად ხელოვნურ ინტელექტს კიდევ მრავალი კომპანია იყენებს. ერთ-ერთი მათგანის, Sentinet-ის ცნობით, სხვადასხვა სოციალურ ქსელში დაახლოებით 400 ისეთი პოსტი ინიშნება, რომლებსაც თვითმკვლელობისკენ მიდრეკილი ადამიანები აქვეყნებენ. ხელოვნური ინტელექტი უბედური შემთხვევების ასარიდებლად ადამიანებისთვის შეუფასებელ შრომას წევს.