მიუხედავად იმისა, რომ ოფისში კატის ყოლა აღარავის უკვირს, ფაქტი, რომ კატების რაოდენობა შეიძლება ათეულობით იყოს ნამდვილად სიახლეა.

ყველაფერი მას შემდეგ დაიწყო, რაც 2004 წელს იაპონურმა ტექნოლოგიურმა კომპანია Qnote-მ ერთ-ერთი სუშის რესტორნიდან კატა აიყვანა, სახელად ფუტაბა და ფაქტობრივად, მათ ერთ-ერთ თანამშრომლად აქცია.

ფოტო: Mynews

კომპანია ამაყობს თავისი ათი "თანამშრომელი" კატით, რომლებიც ოფისის ირგვლივ ცხოვრობენ - მათი უმეტესობა სრულ განაკვეთზეა "დასაქმებული". კომპანიამ თავისი ოფისიც კი განაახლა, რომ მეგობარი კატებისთვის შესაბამისი გარემო მოეწყოთ.

ამ ყველაფერთან ერთად, ოფისი იდეალურ სამუშაო ადგილად იქცა იქ დასაქმებული 32 ადამიანისთვისაც.

ფოტო: Mynews

2020 წელს, როდესაც Qnote შედარებით დიდ, ოთხსართულიან საოფისე შენობაში გადავიდა, მას თავისი ყველაზე მნიშვნელოვანი თანამშრომელბი არ დავიწყებია. კომპანიამ მეორე და მესამე სართულები გაარემონტა, რათა გამოეხატა ერთგულება და სიყვარული კატების მიმართ და ამასთან ერთად, მათი კეთილდღეობისთვის ეზრუნა, ორ სართულზე დამონტაჟდა 12 კატის ტუალეტი, ასევე დაიკიდა თაროები და კედლებიც კი მოიხატა იმისთვის, რომ ნაკაწრები თავიდან აეცილებინათ.

ფოტო: Mynews

Qnote-მ კატებს ოფისში სხვადასხვა როლი მიანიჭა, მათ შორის: "მთავარი კლერკი", "მენეჯერი", "აუდიტორი". თავმჯდომარეა ფუტაბა, რომელიც 20 წლის ასაკში კომპანიის ყველაზე მაღალი რანგის თანამშრომელია, უფროსს, ნობუიუკი ცურუტასაც კი აღემატება.

კომპანიას 11 კატა ჰყავდა, სანამ 2022 წელს ერთი არ გარდაიცვალა. ახლა რვა მათგანი მთელ დღეებს ოფისში ატარებს, ხოლო ორი თანამშრომლის სახლში ცხოვრობს.

ფოტო: Mynew

თავად კატების მოყვარული ცურუტა ამბობს, რომ ახალი თანამშრომლების მოსაზიდად კატების ყოლა ეფექტურ ინსტრუმენტად იქცა და ბოლო წლებში, თანამშრომელთა გადინების სტატისტიკაც კი შემცირდა.

ასევე აღნიშნა, რომ კატებმა ადამიანები ერთმანეთთან დაახლოვა, ხოლო მენეჯერებს ეხმარებიან, რომ თავიანთი გუნდის წევრები უკეთ გაიცნონ, იმისდა მიხედვით, თუ როგორ ურთიერთობენ ისინი კატებთან.