თურქეთმა ოფიციალურად მოითხოვა BRICS-ში გაწევრიანება, რადგან ის ცდილობს გააძლიეროს თავისი გლობალური გავლენა და ახალი კავშირები დაამყაროს ტრადიციული დასავლელი მოკავშირეების მიღმა, — ამის შესახებ Bloomberg წერს.

BRICS შექმნილია, როგორც დასავლური ეკონომიკური ბლოკების ალტერნატივა და ხშირად განიხილება, როგორც ანტიდასავლური ერთობა, სადაც რუსეთი და ჩინეთი დომინირებენ.

სააგენტო წერს, რონ თურქეთს ახალი დიპლომატიური პოლიტიკაა განავითაროს კავშირები ყველა მხარესთან და ამავე დროს შეასრულოს ვალდებულებები ჩრდილოატლანტიკურ ალიანსთან.

„თურქეთი შეიძლება გახდეს ძლიერი, აყვავებული, პრესტიჟული და ეფექტური ქვეყანა, თუ ის გააუმჯობესებს ურთიერთობებს აღმოსავლეთთან და დასავლეთთან ერთდროულად“, — თქვა ერდოღანმა ამ ვიკენდზე სტამბულში.

BRICS ჯგუფი, რომელიც ბრაზილიის, რუსეთის, ინდოეთის, ჩინეთისა და სამხრეთ აფრიკის აბრევიატურაა, რამდენიმე უმსხვილეს ეკონომიკას მოიცავს. მან ოთხი ახალი წევრი მიიღო ამ წლის დასაწყისში — ირანი, არაბთა გაერთიანებული საამიროები, ეთიოპია და ეგვიპტე. საუდის არაბეთი მიწვეული იყო გასაწევრიანებლად, თუმცა სამეფო ამ ნაბიჯისთვის მზად არაა.

სააგენტოს ცნობით, ჯგუფის შემდგომი გაფართოება შეიძლება მოხდეს 22-24 ოქტომბერს, ყაზანში, სამიტზე. მალაიზია, ტაილანდი და, თურქეთის ახლო მოკავშირე, აზერბაიჯანი იმ ქვეყნებს შორის არიან, რომლებიც BRICS-ში აპირებენ გაწევრიანებას.

შეგახსენებთ, რომ BRICS-ში გაწევრიანების განაცხადი მიმდინარე წლის 20 აგვისტოს ოფიციალურად აზერბაიჯანმაც წარადგინა, ამის შესახებ გამოცემა Report-ი იუწყებოდა.