"აირჩიეს ჩემი ძმა, მოჰკიდეს ხელი და წაიყვანეს", - ამის შესახებ IPN-ს რუსული კანონის საწინააღმდეგო აქციებზე დაკავებული გიორგი ოკმელაშვილის ცოლმა, თამთა ჩხეიძემ განუცხადა.

მისი თქმით, არ აქვს ინფორმაცია, სად წაიყვანეს მისი ძმა, გიორგი ჩხეიძე.

"მე არ შევსწრებივარ ამ მომენტს, მე ვიყავი შიგნით, შენობაში და რომ გამოვედი, მითხრეს, რომ ჩემი ძმა დააკავეს. კადრები რომ ვნახე, ის იღებს ამ სიტუაციას, ეზოში რაც ხდება და ამ დროს ესევა ათობით პოლიციელი. კრიმპოლია თუ ვინ არიან ესენი, წარმოდგენა არ მაქვს და იჭერენ ჩემს ძმას. ამ მანდატურების გადაცემული იქნება, აირჩიეს ჩემი ძმა, მოჰკიდეს ხელი და წაიყვანეს.

წარმოდგენა არ მაქვს, სად იმყოფება ამჟამად და სად ჰყავთ გადაყვანილი. საერთოდ არაფერი არ ვიცი, არანაირი ინფორმაცია არ გამაჩნია ამის შესახებ. რომ დავრეკე საპატრულოში, მითხრეს, მათ არ ჰყავთ დაკავებული და კრიმპოლს არ აქვს ტელეფონი, რომ დავრეკო და მათ ვკითხო", — განაცხადა თამთა ჩხეიძემ.

სინდისის პატიმრის, საბა სხვიტარიძის პროცესიდან გამოსულმა მთავარმა მოწმემ, გამომძიებელმა სალომე ედიშერაშვილმა თბილისის საქალაქო სასამართლოს ეზო გაძლიერებული დაცვით, ხმაურისა და შეძახილების ფონზე, დატოვა.

სასამართლოს ეზოში შეკრებილები სკანდირებდნენ "მონა, მონა". სწორედ ამ დროს, სასამართლოს ეზოში პოლიციამ ძალის გამოყენებით დააკავა გიორგი ჩხეიძე, რომელიც რუსული კანონის საწინააღმდეგო აქციებზე დაკავებული გიორგი ოკმელაშვილის ცოლის ძმაა.

საბა სხვიტარიძის პროცესის დასრულების შემდეგ, სასამართლოს ეზოში ერთი პირი დააკავეს