დემოკრატიის კვლევის ინსტიტუტის ინფორმაციით [DRI], იქ მცხოვრები ქართველ მოსახლეობა, მძიმე პირობებთან ერთად, ენობრივ დისკრიმინაციასაც განიცდის.

იქ მცხოვრებთა მძიმე ყოფა, ძირითადად, ყოველდღიური ყოფიდან გამომდინარე, განპირობებულია ფიზიკური და ეკონომიკური უსაფრთხოების განცდის არარსებობითა და ეთნიკური დისკრიმინაციით.

ახალგორის სკოლებში სწავლება 2017 წლამდე ქართულ ენაზე მიმდინარეობდა, ხოლო ამავე წლის სექტემბრიდან სწავლება სრულად რუსულით ჩანაცვლდა.

ახალგორის სკოლებში წლევანდელი დამამთავრებელი კურსი უკანასკნელი იყო, რომელიც განათლებას ქართულ ენაზე იღებდა.

ახალგორის ერთ-ერთი სკოლის პედაგოგი, იმის მიუხედავად, რომ ის რუსულ ენაზე აქამდეც ასწავლიდა, რუსულის არ ცოდნის მიზეზად გაათავისუფლეს, ხოლო მის შემცვლელად "კაგებე"-სთან დაახლოებულ ადამიანს მოიაზრებენ.

დემოკრატიის კვლევის ინსტიტუტის ვარაუდით, ცხინვალის უშიშროების დე ფაქტო სამსახური, რუსულის არ ცოდნის ფაქტს, შესაძლოა, ახალგორის სკოლების ეთნიკურად ქართველი და არალოიალური პედაგოგების მოსაშორებლად იყენებდეს.

მოსწავლეებს რუსულ ენაზე სწავლა, ხოლო მასწავლებლებს რუსულ ენაზე სწავლება უჭირთ, რამაც ახალგორში განათლების ხარისხი მკვეთრად გააუარესა.

ოკუპირებული ახალგორის რაიონის მოქმედი ექვსი სკოლიდან, ორი - კორინთისა და ბოლის სკოლები დაიხურება, რისი ოფიციალური მიზეზიც მოსწავლეების არარსებობაა.

ხოლო, მოსწავლეების სკოლებში არარსებობის მიზეზი — მათი ოჯახების გაუსაძლისი ყოფა.