ჰამასმა დაადასტურა, რომ თეირანში მათი ლიდერი, ისმაილ ჰანიე მოკლეს. თავდასხმაში ისინი ისრაელს ადანაშაულებენ.

ჰამასის განცხადების მიხედვით, ჰანიე მოკლეს "სიონისტებმა, თეირანში მის რეზიდენციაზე თავდასხმის შედეგად, მას შემდეგ, რაც ჰანიემ მონაწილეობა მიიღო ირანის ახალი პრეზიდენტის ინაუგურაციაში".

ბრალდებისთვის ისრაელს ამ დრომდე არ უპასუხია, თუმცა, გასულ წელს პირობა დადეს, რომ 7 ოქტომბერს მომხდარი თავდასხმის შემდეგ, ჰამასის ყველა ლიდერს გაანადგურებდნენ.

აპრილში ისრაელის საჰაერო თავდასხმას ღაზაში ჰანიეს სამი შვილი და ოთხი შვილიშვილი ემსხვერპლა.

ჰანიე გუშინ, 30 ივლისს, თეირანში ირანის პრეზიდენტის მასუდ პეზეშქიანის ფიცის დადების ცერემონიაზე იმყოფებოდა, ჰამასის სხვა ოფიციალურ პირებთან, ჰეზბოლასა და მოკავშირე ჯგუფებთან ერთად.

ცერემონიას ესწრებოდნენ სხვადასხვა ქვეყნის მიწვეული ლიდერებიც, მათ შორის, საქართველოს პრემიერ-მინისტრი, ირაკლი კობახიძე.

რა ვიცით ისმაილ ჰანიეზე: ჰამასს რამდენიმე ლიდერი ჰყავს, თუმცა ჰანიე უმაღლეს ლიდერად მიიჩნეოდა.

  • ის მოძრაობას სათავეში 1980-იან წლებში ჩაუდგა.
  • ისრაელმა ჰანიე 1989 წელს 3 წლით დააპატიმრა, 1992 წელს კი ის ლიბანში გადაასახლეს, ჰამასის რამდენიმე ლიდერთან ერთად.
  • მომდევნო წელს ჰანიე ღაზაში დაბრუნდა. 1997 წელს დაინიშნა ჰამასის სულიერი ლიდერის ოფისის ხელმძღვანელად, ამან მისი პოზიციები კიდევ უფრო განამტკიცა.
  • 2006 წელს ჰანიე პალესტინის პრეზიდენტმა მაჰმუდ აბასმა პრემიერ-მინისტრად დანიშნა, მას შემდეგ, რაც ჰამასმა საპარლამენტო არჩევნებში მანდატების უმეტესობა მოიპოვა.
  • თუმცა, მოგვიანებით, აბასის პარტია ფათაჰი ჰამასმა ღაზის სექტორიდან გააძევა, ჰანიე თანამდებობიდან მოხსნეს. მან ამ ფაქტს არაკონსტიტუციური უწოდა და აღნიშნა, რომ მისი მთავრობა "არ მიატოვებდა პალესტინელი ხალხის წინაშე აღებულ ვალდებულებებს" და გააგრძელა ღაზის მართვა.
  • ჰამასის პოლიტიკური ბიუროს ხელმძღვანელად ის 2017 წელს დაინიშნა.
  • 2018 წელს აშშ-ის სახელმწიფო დეპარტამენტმა ჰანიე ტერორისტად აღიარა.
  • ბოლო წლების განმავლობაში, ის კატარში ცხოვრობდა.