26 ივლისს პარიზის ოლიმპიური თამაშები გაიხსნა. მასშტაბურ ღონისძიებას, რომელიც თითქმის ოთხ საათს გაგრძელდა, მსოფლიოში დიდი განხილვა და არაერთგვაროვანი გამოხმაურება მოჰყვა. გახსნის ცერემონიის ერთ-ერთი სცენა, რომელშიც დრეგ ქვინები მონაწილეობდნენ, მაყურებელთა ნაწილმა გააკრიტიკა, რადგან ლეონარდო და ვინჩის ცნობილი ფრესკის, საიდუმლო სერობის, პაროდიად მიიჩნიეს. კრიტიკა, განსაკუთრებით რელიგიური ჯგუფების მხრიდან, იმდენად დიდი იყო, ოლიმპიადის გახსნის ორგანიზატორებს ბოდიშის მოხდა და იმის ახსნა მოუწიათ, რომ სცენა და ვინჩის ნამუშევარს არ უკავშირდებოდა.

"რასაკვირველია, მიზანი არ ყოფილა რომელიმე რელიგიური ჯგუფისადმი უპატივცემულობის გამოხატვა", — განაცხადა პარიზი 2024-ის პრესსპიკერმა ან დეკამ, — "პირიქით, ტომა ჟოლისთან ერთად, შევეცადეთ, ერთიანობა და ტოლერანტობა გვეზეიმა. შედეგების ნახვის შემდეგ, გვჯერა, რომ მიზანს მივაღწიეთ. თუკი ხალხმა თავის შეურაცხყოფილად იგრძნო, რა თქმა უნდა, ძალიან, ძალიან ვწუხვართ".

ტომა ჟოლი გახსნის ცერემონიის შემოქმედებითი ხელმძღვანელი იყო. ჟოლის თქმით, მისი ინსპირაცია არა და ვინჩის ფრესკა, არამედ ძველბერძნული ღმერთის, დიონისეს, სახე იყო, მიზანი კი — მრავალფეროვნების აღნიშვნა და პატივის მიგება ფრანგული გასტრონომიისადმი.

"სუფრაზე დიონისე იმიტომ ჩნდება, რომ იგი მოლხენის ძველბერძნული ღვთაებაა, ამ სცენას კი სწორედ ნადიმობა ერქვა", — ხსნის ჟოლი, — "იდეის არსი იყო, მოგვეწყო ოლიმპოს მთის ღმერთთან დაკავშირებული დიდი, წარმართული წვეულება. ჩემში ან ჩემს ნამუშევრებში ვერასდროს იპოვით ვინმეს დაცინვის სურვილს".

ოლიმპიადის ოფიციალურმა გვერდმა სოციალურ ქსელში ასევე ახსნა, რომ ეს სცენა ძველბერძნული ღვთაების ინტერპრეტაცია გახლდათ, რომელიც "ადამიანებს შორის ძალადობის აბსურდულობაზე გვაფიქრებს".

თუმცა, ეს სცენა მაყურებელთა ნაწილმა აშკარად სხვაგვარად გაიგო. საფრანგეთის კათოლიკე ეკლესიამ, მაგალითად, განაცხადა, რომ ღონისძიება "ქრისტიანობის გამასხარავების და დაცინვის სცენებს" მოიცავდა. მსგავსი შეფასება გააჟღერა ოკუპანტი რუსეთის საგარეო საქმეთა სამინისტროს პრესსპიკერმა, მარია ზახაროვამ. ეგვიპტის ანგლიკანურმა ეკლესიამ კი წუხილი გამოთქვა და აღნიშნა, რომ "საერთაშორისო ოლიმპიური კომიტეტი გამორჩეულ სპორტულ იდენტობას" კარგავდა.

მწვავე კრიტიკით გამოეხმაურა გახსნის ცერემონიას ფრანგი მემარჯვენე პოლიტიკოსი მარიონ მარეშალიც:

"მივმართავ მსოფლიოში მცხოვრებ ყველა ქრისტიანს, რომელმაც პარიზი 2024-ის გახსნის ცერემონიას უყურა და დრეგ ქვინების მიერ საიდუმლო სერობის პაროდირებით თავი შეურაცხყოფილად იგრძნო: იცოდეთ, რომ ეს საფრანგეთი არ არის, ეს არის მემარცხენე უმცირესობა, რომელიც ნებისმიერი პროვოკაციისთვისაა მზად".

• დრეგ ქუინების ისტორია: შექსპირიდან პოპ-სამყარომდე

რუმინეთის დედაქალაქ ბუქარესტში, საფრანგეთის საელჩოს წინ, საპროტესტო აქციაც მოეწყო. აქციის მონაწილეები იყვნენ ტრეფიკინგსა და გაუპატიურებაში ბრალდებული ენდრიუ ტეიტი და მისი ძმა, ტრისტანი. მათ ოლიმპიადის მონაწილე სპორტსმენებს ბოიკოტისკენ მოუწოდეს.

კრიტიკასთან ერთად, წლევანდელი ოლიმპიადის გახსნის ცერემონიამ ქებაც დაიმსახურა. ასე განხილვადი სუფრის სცენა კი, ზოგმა ხელოვნების სხვა ნიმუშებს, მაგალითად, იოჰან როტენჰამერის ღმერთების ნადიმს დაუკავშირა.