ცნობილია ახალგაზრდის ვინაობა, რომელიც ყაზბეგის გამზირზე, სავარაუდოდ, საპატრულო პოლიციის მანქანასთან შეჯახების შედეგად დაიღუპა.

მედიის ინფორმაციით, ის 19 წლის რევი დემეტრაშვილია.

ტვ პირველის ცნობით, ცხედარი ექსპერტიზის ბიუროდან მის სახლში გადაასვენეს. პროკურატურაში ამ დრომდე არ აცხადებენ, რას ემსხვერპლა 19 წლის ახალგაზრდის სიცოცხლე.

არსებობს ეჭვი, რომ მოტოციკლის მძღოლს საპატრულო პოლიციის ეკიპაჟი აედევნა და მას გზა ჩაუკეტა.

ტვ პირველის ინფორმაციითვე, არსებობს ოქროს მოწმის გადაღებული კადრები, რომლითაც დასტურდება, რომ მოტოციკლი საპატრულო პოლიციის მანქანას შეეჯახა, რომელმაც, სავარაუდოდ, ყაზბეგის გამზირზე გზა ჩახერგა.

ავტოსაგზაო შემთხვევაც და მანამდე განვითარებული მოვლენებიც, სავარაუდოდ, დაფიქსირებული უნდა ჰქონდეს გარდაცვლილი ახალგაზრდის ჩაფხუტზე დამაგრებულ ვიდეო რეგისტრატორსაც, რომელსაც ის, სხვადასხვა დროს, ვიდეოების გადასაღებად იყენებდა.

რევი დემეტრაშვილი ქართულ-ამერიკული სკოლის წარჩინებული კურსდამთავრებული იყო, რომელსაც სწავლა მადრიდის IE University-ში უნდა გაეგრძელებინა, 75%-იანი დაფინანსებით.

გამოძიება პროკურატურამ 276 მუხლის მე-6 ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას ნიშნავს, რამაც ადამიანის სიცოცხლის მოსპობა გამოიწვია.