იაპონიის სამხრეთ ნაწილში, კუმამოტოს პრეფექტურაში, სამშაბათს წინასწარი მონაცემებით 7.1 მაგნიტუდის სიმძლავრის მიწისძვრა მოხდა. სტიქიამ ათასობით აბონენტი ელექტროენერგიის გარეშე დატოვა, შეაჩერა სარკინიგზო მიმოსვლა და ცუნამისა და განმეორებითი ბიძგების საფრთხის შესახებ გაფრთხილებები გამოიწვია. ინფორმაციას Reuters ავრცელებს.

მიწისძვრის ზონაში საწარმოები აქვთ ისეთ კომპანიებს, როგორიცაა Sony და მსოფლიოს უმსხვილესი საკონტრაქტო ჩიპების მწარმოებელი TSMC. Sony-ის წარმომადგენლის განცხადებით, კომპანია ვითარებას სწავლობს, ხოლო TSMC-ს Reuters-ის კომენტარის მოთხოვნაზე ამ ეტაპზე პასუხი არ გაუცია.

იაპონიის მთავრობამ საგანგებო გაფრთხილება გამოსცა კუმამოტოს, ნაგასაკის, კაგოშიმას, ფუკუოკას, საგას, ოიტასა და მიაძაკის პრეფექტურებისთვის, რომლებიც ქვეყნის სამხრეთ კიუშუს კუნძულზე მდებარეობს.

იაპონიის მეტეოროლოგიური სააგენტოს ინფორმაციით, მიწისძვრის შემდეგ გამოცხადდა ცუნამის გაფრთხილება, რადგან მოსალოდნელია დაახლოებით 1 მეტრის სიმაღლის ტალღა.

იაპონია მსოფლიოში ერთ-ერთი ყველაზე სეისმურად აქტიური ქვეყანაა — აქ მიწისძვრა საშუალოდ ყოველ ხუთ წუთში ერთხელ მაინც ფიქსირდება. ქვეყანა მდებარეობს ე.წ. "ცეცხლის რგოლზე" — ვულკანებისა და ოკეანური ღრმულების სარტყელზე, რომელიც წყნარი ოკეანის აუზს აკრავს. მსოფლიოში 6.0 და მეტი მაგნიტუდის მიწისძვრების დაახლოებით 20% სწორედ იაპონიაზე მოდის.