რუსეთის პრეზიდენტი ვლადიმერ პუტინი სომხეთის პრემიერმინისტრ ნიკოლ ფაშინიანს სომხეთში EU-ში გაწევრიანების საკითხზე რეფერენდუმის ჩატარებას სთხოვს. ამის შესახებ რუსეთის პრეზიდენტის პრესმდივანმა, დმიტრი პესკოვმა განაცხადა. სატელეფონო საუბრის დეტალებზე რუსული მედია წერს.

პესკოვის თქმით, ამ რეფერენდუმის ჩატარება საჭიროა იმისათვის, რომ "განისაზღვროს, რომელი მიმართულებით სურთ სომხეთის მოქალაქეებს ქვეყნის განვითარება".

"ასევე შედგა საუბარი იმ შეთანხმებისა და განცხადების გაგრძელების კონტექსტში, რომელიც ცოტა ხნის წინ ევრაზიული ეკონომიკური კავშირის (ЕАЭС) წევრი ქვეყნების ლიდერებმა სომხეთთან დაკავშირებით მიიღეს. ხაზი გაესვა სომხეთში რაც შეიძლება მალე რეფერენდუმის ჩატარების აუცილებლობას, რათა განისაზღვროს, რომელი მიმართულებით სურთ სომხეთის მოქალაქეებს ქვეყნის განვითარება", — განაცხადა პესკოვმა.

სომხეთის მთავრობის პრესსამსახურმა, ამ საუბრის კომენტირებისას განაცხადა, რომ "ფაშინიანმა ხაზგასმით აღნიშნა: რეფერენდუმის ჩატარება პრაქტიკულად შესაძლებელი იქნება მხოლოდ მას შემდეგ, რაც სომხეთი ევროკავშირში გაწევრიანების შესახებ ოფიციალურ განაცხადს წარადგენს და ეს საკითხი კონკრეტულ განხილვის საგნად იქცევა".

რუსეთის მხარე აცხადებს, რომ ერევანს არჩევანის გაკეთება მოუწევს, რადგან ერთდროულად ორ ინტეგრაციულ გაერთიანებაში — ევროკავშირსა და ევრაზიულ ეკონომიკურ კავშირში, წევრობა შეუძლებელია. მოსკოვში ასევე აღნიშნავდნენ, რომ მზად არიან მიიღონ ერევნის ნებისმიერი გადაწყვეტილება, თუ ის სომეხი ხალხის ინტერესებს შეესაბამება.