ოცნების დეპუტატი დავით მათიკაშვილი შალვა პაპუაშვილის განცხადებას ეხმაურება ევროკავშირში გადაწყვეტილებების მიღებისას კონსენსუსის პრინციპის გაუქმების ინიციატივის შესახებ. დავით მათიკაშვილი აცხადებს, რომ "ის გადაწყვეტილებები და სურვილები, რაც გააჩნიათ კონკრეტულ პირებს, თუკი მათი რეალიზება მოხდა და რეალურად არ მოხდა გათვალისწინება ყველა ქვეყნის ნება-სურვილის, რის საფუძველზეც იყო თავის დროზე შექმნილი ევროკავშირი, გამოდის, რომ ის პირდაპირ გარდაიქმნება, ძალიან უახლოვდება მმართველობისა იმ ფორმას, რომელიც ჰქონდა საბჭოთა კავშირს. ეს ის ევროკავშირი ნამდვილად არ არის, რომლისკენაც სწრაფვა არის თავისუფალი, ღირსეული ერის სურვილი, რომ იყოს რაღაცა სუვერენიტეტჩამორთმეული და მოქცეული, ისეთ კალაპოტში, რომელიც მის ღირსებას ნამდვილად არ შეესაბამება. ამიტომაც მეტი დაფიქრება მმართებს ალბათ ყველას გადაწყვეტილებების მიღების დროს", — განაცხადა დავით მათიკაშვილმა პირველ არხთან საუბრისას.

ცნობისათვის, პარლამენტის თავმჯდომარემ, შალვა პაპუაშვილმა გუშინ სოციალურ ქსელში დაწერა, რომ ევროკავშირში გადაწყვეტილებების კონსენსუსით მიღების წესის გაუქმების გერმანულ ინიციატივას უკვე თორმეტი ქვეყანა შეუერთდა. ამ ფონზე, მისი შეფასებით, სულ უფრო აქტუალური გახდება კითხვა: რა აზრი აქვს ევროკავშირში წევრობას, თუ წევრობის უმთავრეს სარგებელსა და ბერკეტებს თავიდანვე გართმევენ?