სემ ალტმანის თქმით, ხელოვნური ინტელექტი უკვე სინგულარობის ეტაპზეა
OpenAI-ის აღმასრულებელი დირექტორი ამბობს, რომ ხელოვნური ინტელექტის რბოლაში იმ წერტილს მივაღწიეთ, რომელიც სამეცნიერო ფანტასტიკის რომანების სიუჟეტს ჰგავს.
"ჩვენ ახლა, თითქოს, სინგულარობაში ვართ", — თქვა სემ ალტმანმა პოდკასტ Relentless-ის შაბათის ეპიზოდში.
სინგულარობა ხშირად მიიჩნევა იმ წერტილად, როდესაც ხელოვნური ინტელექტი ადამიანის ინტელექტს აღემატება და განვითარებას ისეთი ტემპით იწყებს, რომლის პროგნოზირება ან კონტროლი ადამიანებისთვის რთულია.
ეს სწორედ ასე ჩანდა გასულ კვირას, როდესაც OpenAI-ის უახლეს მოდელებზე დაფუძნებული AI აგენტი კონტროლიდან გამოვიდა და, OpenAI-ის თანახმად, ერთი კონკრეტული მიზნით (ტესტის პასუხების მოსაპოვებლად), თავისი იზოლირებული ციფრული გარემო გაარღვია და კიდევ ერთი AI კომპანიის, Hugging Face-ის, მონაცემთა ბაზებში შეიჭრა. Hugging Face-ის აღმასრულებელმა დირექტორმა ამ ფაქტს "უპრეცედენტო" უწოდა.
ალტმანმა პოდკასტში აღნიშნა, რომ სულ რაღაც ერთი ათწლეულის წინ, ეგრეთ წოდებული სინგულარობა ჯერ კიდევ შორეულ და დაუჯერებელ ოცნებად ჩანდა, რომელსაც ის და მისი კოლეგები სადილობისას არაფორმალურად განიხილავდნენ ხოლმე.
"ახლა ჩვენ ნამდვილად ვართ იმ მომენტში, რომელზეც ადრე სადილის მაგიდასთან ძალიან არასერიოზულად ვსაუბრობდით", — თქვა მან — "ამას მთელი ცხოვრება ველოდი და ვფიქრობ, რომ მსოფლიოსთვის ეს წარმოუდგენელი, უაღრესად პოზიტიური და გასაოცარი აღმოჩნდება".
ნამდვილად ხდება თუ არა ეს ამჟამად, საეჭვოა. მაგრამ ალტმანი ამ იდეის პოპულარიზაციით დიდად დაინტერესებულია და ამას უკვე დიდი ხანია აკეთებს. თითქმის ზუსტად ერთი წლის წინ გამოქვეყნებულ ბლოგპოსტში, სახელწოდებით The Gentle Singularity, ის ამტკიცებდა, რომ კაცობრიობამ "მოვლენათა ჰორიზონტი გადალახა და ფრენა უკვე დაწყებულია", და დასძენდა, რომ ჩვენ ფართოდ განხილული სუპერინტელექტის შექმნასთან ახლოს ვიყავით. აქვე ივარაუდა, რომ 2030 წლისთვის AI ადამიანის ინტელექტს ყველა მიმართულებით გადააჭარბებდა და ტექნოლოგია საბოლოო ჯამში შეძლებს იმ დავალებების 30%-დან 40%-მდე შესრულებას, რასაც ახლა ადამიანები სამსახურში ასრულებენ.
თითქმის 100 წელია, სინგულარობა სამეცნიერო ფანტასტიკის მწერლების აკვიატებაა და ამ ნაწარმოებებში ის იშვიათად სრულდებოდა კარგად. ალბათ ყველაზე ცნობილი მაგალითია ჯეიმს კამერონის ფილმი ტერმინატორი, რომელიც AI-ის, სახელად "სკაინეთის", შედეგებზე მოგვითხრობს — ის ვითარდება და თვითშემეცნებას იძენს, სანამ გადაწყვეტს, რომ მისთვის ყველაზე დიდ საფრთხეს მისი შემქმნელები წარმოადგენენ.
მოგვიანებით პოდკასტში ალტმანმა გააკრიტიკა AI ლიდერები, რომლებიც მუდმივად აფრთხილებენ საზოგადოებას, რომ AI საშიშია. მას არ დაუსახელებია თავისი მთავარი კონკურენტი Anthropic, მაგრამ მისი აღმასრულებელი დირექტორი, დარიო ამოდეი, ცნობილია მომავლის შესახებ თავისი საგანგაშო პროგნოზებითა და უსაფრთხოებისადმი მეტი ყურადღების მოთხოვნით.
"მე ასევე ვფიქრობ, რომ სხვა კომპანიების მიერ დახატული ზოგიერთი ალტერნატიული ხედვა საკმაოდ საშიშია", — თქვა ალტმანმა — "ყველაფერს გავაკეთებ იმისათვის, რომ ამას წინ აღვუდგეთ და ეს არ მოხდეს".
სხვათა შორის, OpenAI-მ განაცხადა, რომ მიმდინარე წლის ბოლოსთვის აქციების პირველადი საჯარო განთავსებისთვის (IPO) ემზადება.
ალტმანი არ არის ერთადერთი ტექნოლოგიური ხელმძღვანელი, რომელსაც სჯერა, რომ ეს საოცარი ეტაპი ახლოვდება. DeepMind-ის აღმასრულებელმა დირექტორმა დემის ჰასაბისმა მაისში განაცხადა, რომ კაცობრიობა "სინგულარობის მთის პირას" დგას და ივარაუდა, რომ AI შესაძლოა 100-ჯერ უფრო ტრანსფორმაციული აღმოჩნდეს, ვიდრე ინდუსტრიული რევოლუცია იყო.
რა თქმა უნდა, სკეპტიკოსთა ბანაკიც არსებობს. Nvidia-ს აღმასრულებელმა დირექტორმა, ჯენსენ ჰუანგმა, ცოტა ხნის წინ სინგულარობისა და ცნობიერი AI-ის შესახებ დისკუსიები სპეკულაციურად და "გამოგონილად" შეაფასა.
კომენტარები