მიუხედავად იმისა, რომ ბეჭდების მბრძანებლის ტრილოგიამ მსახიობებს მსოფლიო პოპულარობა მოუტანა, მათი ანაზღაურება ფილმების წარმატების შესაბამისი არ ყოფილა. შონ ესტინის თქმით, სემუაიზ გემჯის როლისთვის იმდენად მცირე თანხას უხდიდნენ, რომ გადაღებების პერიოდში სახლის გაყიდვაც კი მოუწია.

"არ ვიყავი მზად ასეთი ცნობადობისა და ყურადღებისთვის. უცნაური სხვაობა იყო იმ ინტერესს შორის, რომელსაც ჩემ მიმართ იჩენდნენ და იმ თანხას შორის, რომელსაც რეალურად იხდიდნენ. ტრილოგიაზე იმდენად მცირე ანაზღაურებაზე შევთანხმდი, რომ სახლის გაყიდვა მომიწია", — თქვა მსახიობმა The Guardian-თან ინტერვიუში.

ფოტო: New Line Cinema

შონ ესტინმა სამივე ფილმში მონაწილეობისთვის დაახლოებით $250 000 მიიღო — მას თითოეულ ნაწილში დაახლოებით $75 000 შესთავაზეს. ამავე პერიოდში ტრილოგიამ მსოფლიოს კინოთეატრებში ჯამში $2.9 მილიარდი გამოიმუშავა.

მსახიობების დაბალი ანაზღაურება ნაწილობრივ გადაღების უჩვეულო ფორმას უკავშირდებოდა. პიტერ ჯექსონმა სამივე ფილმი ერთდროულად გადაიღო, ამიტომ მსახიობებს პირველი ნაწილის წარმატების შემდეგ ხელშეკრულების ხელახლა განხილვისა და ხელფასის გაზრდის შესაძლებლობა არ ჰქონიათ.

ამის შესახებ ადრე ელაიჯა ვუდმაც ისაუბრა. მისი თქმით, სტუდია სამივე ფილმის ერთდროულად გადაღებით დიდ ფინანსურ რისკზე წავიდა და ამიტომ მსახიობებს განსაკუთრებით მაღალი ანაზღაურება არ შესთავაზა. ორლანდო ბლუმმა კი თქვა, რომ ლეგოლასის როლისთვის მთლიანად ტრილოგიაში მხოლოდ $175 000 მიიღო.

ესტინი აღნიშნავს, რომ ახლა ფინანსურად სტაბილურადაა, თუმცა იმ პერიოდში ასე არ ყოფილა. ამჟამად ბეჭდების მბრძანებლის ახალი ფილმები მზადდება, მათ შორის The Hunt for Gollum, თუმცა ჯერ დადასტურებული არ არის, ითამაშებს თუ არა შონ ესტინი ფილმში.