შინაური ცხოველის დაკარგვა უბრალოდ ცხოველის დაკარგვას არ ნიშნავს — ხშირად ეს ოჯახის სრულუფლებიანი წევრის, ერთგული მეგობრისა და უპირობო სიყვარულის წყაროს დაკარგვაა. პატრონის გულში კი ყოველთვის რჩება იმედის ნაპერწკალი, რომ დაკარგული ერთგული მეგობარი ერთ დღეს ისევ გამოჩნდება. სწორედ ასეთია კლერ ჯერომისა და მისი დაკარგული ფისოს — იანის ისტორია, რომლებიც ერთმანეთს განშორებიდან 8 წლის შემდეგ შეხვდნენ.

კლერმა იანი მას შემდეგ დაკარგა, რაც საცხოვრებელი შეიცვალა. როგორც გაირკვა, 8 წლის განმავლობაში იანს პერიოდულად ადამიანები ეხმარებოდნენ და მასზე ზრუნავდნენ. თუმცა, იანის ერთ-ერთი მზრუნველი სხვაგან გადავიდა საცხოვრებლად, რის გამოც ახლა უკვე 10 წლის ფისო ცხოველთა თავშესაფარში გადაიყვანეს.

მიუხედავად იმისა, რომ იანს მიკროჩიპიც ჰქონდა, პატრონთან დაკავშირება მაინც ვერ მოხერხდა. ამიტომ, თავშესაფრის თანამშრომლებმა, პატრონის პოვნის მიზნით, სოციალურ ქსელში ფისოს ფოტოები გამოაქვეყნეს.

ფოტო: Facebook

კლერ ჯერომმა განაცხადა, რომ იანის პოვნის იმედი არასდროს დაუკარგავს. ფისოს დაკარგვის შემდეგ, ის ყოველდღე ბრუნდებოდა თავის ძველ სახლში, თუმცა უშედეგოდ. კლერის თქმით, როდესაც მამამ და მეგობარმა Facebook-ზე გამოქვეყნებული პოსტის შესახებ უთხრეს, ატირდა, რადგან ფოტოზე ნაჩვენები ფისო იანს ძალიან ჰგავდა.

"სანახავად მივედი და როგორც კი დივნის ქვემოდან გამოვიდა და ჩემკენ წამოვიდა, მაშინვე ვიცანი. მომესალმა და მეც მაშინვე ცრემლები წამომივიდა. სიტყვებით ვერ ავხსნი, რა საოცარი გრძნობა იყო", — იხსენებს კლერი.

იანი არა მხოლოდ პატრონს, არამედ ოჯახსაც დაუბრუნდა. მას დები, ძმები და ხანდაზმული დედაც ჰყავს.